Brexitip kingorna periarfissani arlalinni Nunarput inissisimalluartoq
Tuluit Nunaat EU-mit aninissamini isumaqatigiissuteqarluni isumaqatigiissuteqaraniluunniit ilaasortaajunnaaraluarpalluunniit, Nunatsinnit tunisassiat ukiumi siullermi akitsorsaataasumik akitsuuserneqassanngillat. Taamaalilluni isumaqatigiinniarnerit ingerlateqqinnissaannut eqqissisimasoqassaaq piffissaqartoqarlunilu, Bruxellesimi sinniisoqarfimmi pisortaq oqarpoq.
Brexitimik suliniuteqarnermi ilungersunartumi nutaarsiassaq kingulleq tassaavoq, Tuluit Nunaat apriilip aqqaneq-aappaanni 2019-imi EU-mut ilaasortaajunnaassasoq, tassa Tuluit Nunaata aamma EU-p ilaasortaajunnaarnissamut isumaqatigiissut Tuluit inatsisartuinit aamma Europa-Parlamentimit akuersissutigineqassanngippat.
Sermitsiaq allappoq.
Taama pisoqassappat Tuluit Nunaat maajip 22-anni 2019-imi EU-mit anissaaq. Tuluit Nunaanni ministeriunerup Theresa Mayip aamma EU-mi naalagaaffiit siuttuisa sapaatip-akunnerani kingullermi ataatsimeeqatigiinneranni tamanna aalajangiunneqarpoq.
Isumaqatigiinniarnerit qasusooqqajaannarsisutut malunnartut, Bruxellesimi Nunatta sinniisoqarfianit malinnaaffigeqqissaarneqarput.
– Qanoq pisoqarsinnaaneranik eqqoriaalluni oqallinnerit amerlaqisunit qatsunneqamisaalerput. Maanna toqqammavigisinnaasatsinnik aalajangiisoqartariaqalerpoq, Bruxellesimi Nunatta sinniisoqarfiani pisortaq Mininnguaq Kleist oqarpoq, taassuma ilanngullugu oqaatigaa, Tuluit Nunaat qanorluunniit aalajangiussaqassagaluarpat Nunarput niuernikkut inissisimalluartoq, tassa siunissami ukiumi ataatsimi tulliuttumi.
Tuluit Nunaat isumaqatigiissuteqarani EU-mit anissagaluarpat, Tuluit Nunaata naalakkersuisuisa nioqqutissat eqqussorneqartut akitsuuserneqarallartussat allattorsimaffiat saqqummiuppaat.
Allaaserineqartoq aviisimi Sermitsiami, tallimanngormat saqqummersumi, tamakkiisumik atuarneqarsinnaavoq. Aviisi uani pisiariuk: