Timmisartortitsineq
Braski niuerniaqqittoq
Finlandimiut timmisartortitseqatigiiffiata Green Air 75 procentia Sky Greenlandip pisiaraa
Timmisartortitseqatigiiffinnik aallartisaasoq Gert Brask, Danmarkimi timmisartortitseqatigiiffimmi Sky Greenlandimi siuttuusoq, ingerlatseqatigiiffinnik suli pisiortorpoq.
Green Airip timmisartortitseqatigiiffik Finlandimiittoq Sky Greenlandip 75 procentia pisiaraa. Sky Greenland Facebookimi taama ilisimatitsivoq.
Denim Air
Gert Braskip timmisartortitseqatigiiffik Denim Air Hollandimiittoq pisiarisimagaa januaarimi paasinarsivoq.
Atuaruk: Brask timmisartortitseqatigiiffimmiik pisivoq
Pisinermut tunngatillugu Gert Braskimit oqaaseqartitsiniarneq pisinnaasimanngilaq.
Ingerlatsivik piviusuunngitsoq
Nittartagaq ch-aviation.com naapertorlugu timmisartortitseqatigiit Green Air timmisartuuteqanngilaq. Tassa imaappoq, ingerlatsivik timmisartunik attartortartoq aammalu ingerlatsisunik timmisartuussinermut akuersissutilinnik sulisitsisartut.
Gert Braskip timmisartortitseqatigiiffia Greenland Express, maanna Danmarkimi ingerlatsinermut aqutsisoqarfimmit pinngitsaaliissummik matuniarneqarpoq, taanna aamma timmisartuuteqarani ingerlanneqarpoq.