arsaanneq
Brasilien Argentinamut VM-mut anngunniunnermut ajugaavoq
Argentinep VM 2018-mut peqataanissaa qularnarpoq
VM-mut anngunniunnermut Brasilien Argentinellu unamminerat pissangatitsilaavissorpoq.
Brasilien 3-0-mik ajugaammat Argentinep VM 2018-mut annguttut sisamaannut inissinnissaat qularnarsivoq.
Argentine maanna anngunniuttuni nr. 6-tut inissisimavoq VM-mullu anngutissaguni nr.5-mut inissittariaqarluni. Taamaasilluni playoff-mik taaneqartartumik unamminissaminut periarfissaqalissagami.
Argentinep Lionel Messi, Gonzalo Higuain Angel Di Marialu siukkaralugit Brasiliep Neymar, Gabriel Jesus Philippe Coutinholu unammivaat.
Unamminerullu minutsii 20-t siulliit pissanganerup kinguneranik ingerlanerliortoqarnerani aatsaat minutsit 24-ssaanni Argentinap isertitsinissaminut periarfissinneqaraluarpoq. Laziollu isertitseriarnera Brasiliep målmandianit Alissonimit annaanneqarpoq.
Minutsillu tulliani Coutinho saassussivoq. Liverpoolimilu arsartartup arsaaffiup saamiatungaatigut Argentinap målmandia Romero skruerluni isertitsifigalugu.
Isertitsineq Argentinap tupaallaatigaa. Unamminerullu immikkoortuata siulliup naammassinissaanut minutsiinnanngortoq Gabriel Jesus iliminut Neymarimut arsamik tunniussinera iluatsimmat Brasiliemiut marloraarlutik siuarput.
Unamminerup immikkoortuata aappaanni Manchester Citymi arsaattartoq Sergio Agüero isertippaa. Taassumalu arsaannerup ingerlanera allanngortissinnaanngilaa.
Brasiliellu saassussisaarnini attatiinnarpaa, unamminerullu minutsiata 61-issaanni Paulinho isertitsimmat 3-0-mik siuarlutik.
Arsaanneq Belo Horizontemi ingerlanneqarpoq. Brasiliemilu arsaattartut VM 2014-mi semifinalemi Tysklandimut oqaluttuarisaanermi aatsaat taama kinguarsimatigalutik, tassa 1-7-mik, ajorsarfigineranit aatsaat unammiffigeqqillugu.
/ritzau/