Bosse: Savalimmiut tununneqarpoq - Kalaallit Nunaajunngitsoq
Stine Bossep inuttut inuunerani pissutsit nutaat aalajangiisuusimapput BankNordikip siulersuisuini siulittaasutut tunuarneranut. Savalimmiut tununneqarpoq. Kalaallit Nunaajunngitsorli.
- Inuttut atukkat pissutigalugit nammineq inuttut inuunera salliutittariaqarsimavata, siulersuisunilu sulisarnera annikillisarlugu, Stine Bosse, siulersuisut siulittaasuattut ukiuni tallimani sulereerluni tunuartoq pillugu ullormi BankNordip nalunaaruteqarfiani Sermitsiaq.AG-mut nassuiaavoq. Siulersuisutut tunuassaaq aningaaseriviup martsip qaammataata naalernerani ileqquusumik ataatsimeersuarnerani.
Stine Bosse Namminersorlutik Oqartussat suliffeqarfiutaanni Tele Greenlandimi aamma Nuna Oilimi siulersuisunut aamma siulittaasuuvoq.
Suliffeqarfinni taakkunani marlunni suliunnaarnissannik pilersaaruteqarpit?
- Naamik. Naamerluinnaq. Kalaallit Nunaat nuannarisupilussuuara, Tele Greenlandimilu aamma suliffeqarfimmi mikinerusumi Nuna Oilimi sulineq soqutiginartupilussuartut isigaara, Stine Bosse erseqqissaavoq.
Piginnittut aalajangiisuusartut
Stine Bossep oqaatigaa, soorunami piginittut – Namminersorlutik Oqartussat – tassaasut ingerlatseqatigiiffinni taakkunani marlunni siulersuisut siulittaasuattut atuutinnassanersoq pillugu naggataatigut aalajangiisuusussaasut. Namminerli aalajangiisinnaasuuguni qularutigeqqunngilaa, Bossep Kalaallit Nunaat pinnagu Savalimmiut tunussimagaa.
- Ataaserli qularnanngilaq. Tassalu Kalaallit Nunaanni ingerlatseqatigiiffiit taakku marluusut qimannissaannik pilersaaruteqannginnera, Stine Bosse ukiuni tallimani BankNordip siulersuisuini siulittaasuunermini aningaaserivimmi aktiaatilinnut iluanaaruteqartitsisarneq ilutigalugu niuernermik ukkatarinninnerulersitsisimasoq suliassanillu annikillisaasimasoq erseqqissaavoq.