Bosse Nunaoil pillugu: Mikinerulersinnaanngilaq

Kalaallit Nunaanni uuliasiorfiutileqatigiiffik Nunaoil tallimanngormat ullup-qeqqata siornatigut ataatsimeersuarpoq. Ingerlatseqatigiiffiulli siulersuisuini siulittaasoq Stine Bosse ukiup siuliani suliarineqarsimasut pillugit oqaluttuassaqarpallaarsimanngilaq.

- Aamma ukioq manna, oqarluannaraanni ujaasinissamut akuersissummik pissarsiniartoqarsimanngilaq. Suliaqartoqangingajappoq, ataatsimeersuarnermi siulersuisut siulittaasuat oqarpoq.

Ukiumi angusat takutippaa, 2,28 millioner koruuninik amigartooruteqartoqarsimasoq, angusarisimasallu 2019-imi 1,7 millioner koruuninik amigartooruteqarsimanermit ajornerulaarput.

Amigartooruteqartoqarmat ingerlatseqatigiiffiup nammineq aningaasaatai 9,6 millioner koruuniniit 7,3 millioner koruuninut nalikillineqarsimapput.

Stine Bossep amigaarooruteqangaatsiarnermut nassiuaatigaa, suliakinnerulerneq aningaasanik naleqartoq, 2020-llu ingerlanerani suliakinnerusoqarsimavoq.

Kuno Fencker siulersuisuni ilaasortanngortoq - affaannarnik akissarsiaqartinneqarluni

2020-mi ukiakkut pisortaaneq Signe Ulfeldt Hede inuulluaqquneqarpoq, siulersuisunilu ilaasortaq Søren Lennert Mortensen ingerlatseqatigiiffimmi pisortanngortinneqarallarluni.

Taanna aamma maannakkut tunuarpoq, ingerlatseqatiiffimmilu sulisoq ataasiinnanngorluni, tassalu ingerlatseqatigiiffimmi psiortaq Thomas Varming.

- Maanna minneruleqqissinnaanngilagut. Suliassaqartoqartinnagu taamaattussaavoq, Stine Bosse oqarpoq.

Nunaoilimi siulersuisut nutaat

Stine Bosse, siulittaasoq

Susanne Juhl, siulittaasup tullia, naalagaaffimmit toqqagaq

Kuno Fencker, siulersuisuni ilaasortaq

Naalakkersuisut ataatsimeersuartoqarnera iluatsillugu Kuno Fencker siulersuisuni ilaasortatut nutaatut atuutsilerpaat. Taanna Søren Lennert Mortensen taarserlugu ilaasortanngorpoq.

Kuno Fencker 2014-imiit 2018-imut Royal Arctic Linep siulersuisuini siulittaasuusimavoq. Aamma politikkikkut ingerlataqarsimavoq, ilaatigullu 2019-imi Partii Naleraq sinnerlugu folketingimut qinigassanngortissimalluni, Siumullu sinnerlugu upernaaq Inatsisartunut qinigassanngortissimalluni.

Ingerlatseqatigiiffimmi suliaqartoqarpallaannginnera pissutigalugu, siulersuisut sulinerminni nalinginnaasumik akissarsiarisartakkamik affaannaanik akissarsiaqartinneqalerput.

Tassa siulersuisuni siulittaasoq 75.000 koruunisisassaaq, siulittaasup tullia 37.500 koruuninik siulersuisunilu ilaasortaq 25.000 koruuninik akissarsiaqartinneqalerlutik.