isornartorsiuisoqareersoq

Born-ip nalunaarusiortoq Meltofte isumaqatiginngilaa

Nalunaarusiap qanoq paasineqarsinnaanera biologit isumaqatigiissutiginngilaat

Nalunaarusiami ip assilisai assitaritinneqarput. Nalunaarusiap saavani terianniaq assitaritinneqarpoq Carsten Egevang

Erik W. Bornip Issittumi uumasut pillugit nalunaarusiaq isornatorsiorpaa. Nalunaarusiaq Hans Meltoftimit allanneqarpoq, taassumallu Kalaallit Nunaanni pinngortitaq pillugu ingerlatsisut isornartorsiorpai. Ilisimatuut 252-it peqatigalugit nalunaarusiaq ”Arctic Bioversity Assessment”, ABA, suliaraa.

Hans Meltoftip aarrinik puisinillu misissuisimanera kukkussuteqartoq Erik W. Born oqarpoq.

Nalunaarusiami timmissat pillugit Erik W. Born peqataavoq. Pinngortitaleriffimmi ilisimatuutut sulinikuuvoq, maannakkullu siunersuisartutut atorfeqarluni.

Pinngortitamik aqutsisut Hans Meltoftip Politikenimi isornartorsiungaatsiarpai.

Born Sermitsiami ima allappoq: 'Nalunaarusiami pinngortitamut ingerlatsisut isornartorsiorneqangaatsiarput. Nalunaarusiamik atuartut isumaqarput nalunaarusiami isornartorsiuiinnaavilluni allattoqartoq. Tamanna tusagassiorfinni oqallinnermik pilersitsivoq, Kalaallit Nunaallu kukkusumingaasiit nalilerneqartutut isikkoqarluni.

Inunnut oqallittunut Meltofte oqarpoq nalunaarusiaq atuaqqaarlugu isummersortoqassappat pitsaanerusoq. Uanga atuareerpara. Nalunaarusiaq Kalaallit Nunaannut nikaginnippallaanngilaq. Nalunaarusiami ilaatigut oqaatigineqanngilaq Kalaallit Nunaanni pinngortitamik ingerlatsinerluttoqartoq. Meltoftip oqaatsini nammineq akisussaaffigissavai, kisianni aamma Aarhusip Universitetiata akisussaaffigaa?

Tunngaviusumik eqqortumik Meltoftip oqaasii aviisimi Politikenimi eqqunngillat, tassani aarrit puisillu eqqartorneqarlutik. Uanga aarrit puisillu inuunerma ilarujussuini samminikuuakka, appalli oqaaseqarfigissanngilakka", Born ilaatigut oqarpoq.

Silap allanngoriartornera pissutaanerpaasoq nalunaarusiami inerniliisoqarpoq. Nalunaarusiarlu Conservation of Arctic Flora aamma Fauna (CAFF)-ikkut saqqummiunneqarluni.

Aviisimi saqqummersartumi Bornip allagaa atuarneqarsinnaavoq kiisalu avatangiisinut pinngortitamullu naalakkersuisoq Kim Kielsen Siumut oqaaseqaatai. Siunersuutit amerlanerusariaqartut Kim Kielsen isumaqarpoq, kiisalu nalunaarusiap saqqummiunnerani isornartorsiuinerit uggornartoqartillugit.

Appat iliuuseqarfiginissaat aamma atuarneqarsinnaavoq, tassani ukiuni qulini piniaqqusaannginnissaat siunersuutigineqarluni imaluunniit pisassiissutit ikilineqarnissaat pisariaqassasoq oqaatigineqarluni.

- Tamanna aallartereerparput. Appat piniaqqusaanngilluinnarnissaat politikkikkut anguneqarsinnaagunanngilaq kisiannili oktobarip 15-anit februaarip 28-ata tungaanut pisassiisarnerit ikilineqareerput. Aamma inatsisaalereerpoq inuussutissarsiutiginagu piniartartut angalanermi ataatsimi tallimaannarnik appannik pisaqarsinnaatitaasut, Kim Kielsen aviisimut oqarpoq.

Powered by Labrador CMS