Bormesterip sinniisaata Tasiilami sumiginnaasoqarnera nassuerutigaa

Kommuneqarfik Sermersuumi borgmesterip sinniisaata Randi Vestergaard Evaldsenip (D) kommunip Tasiilami meeqqanik sullissinera kipiluttunartoq nassuerutigaa.

- Isumaginnittoqarfimmi suliat pillugit sumiginnaasoqarpoq, taanna Sermitsiaq.AG-mut oqarpoq.

Piviusulersaarut 'Byen hvor børn forsvinder' ippassaq DR2-kkut takutinneqarnerata taama qisuariatoqarpoq. Borgmester Asii Chemnitz Narup (IA) sulinngiffeqarnini pissutigalugu oqaaseqarsinnaanngimmat, Randi Vestergaard Evaldsen oqaaseqarpoq.

- Tasiilami imminut toquttarnerit kinguaassiutitigulli kanngutsaattuliortarnerit annertuumik ajornartorsiutaanera nassuerutigisariaqarparput, borgmesterip sinnissaa oqarpoq.

Atorfiit inuttaqanngitsut

Piviusulersaarummi takutinneqarpoq, kannguttaatsuliorfigitissimasut imminullu toqunnissamik eqqarsaateqartartut ikioqqusarsimangaluartut – ikiorneqaratillu.

- Tasiilami innuttaasoq oqarfigerusuppakka soqutigingatsigit. Imaasiallaannarli aaqqinneqarsinnaanngitsumik aaqqissuussaanikkut ajornartorsiuteqarpugut.

Ajornartorsiutit ilagaat Tasiilami isumaginnittoqarfimmi atorfiit inuttaqanngitsut kommunimit ilungersuutigineqartut. Tamatuma kingunerisaanik aasaq kingulleq angalasartunik pilersitsisoqarpoq.

- Iliuutsigut naammattut oqarsinnaanngilanga, kisianni iliuuseqarpugut. Ilaatigut psykoterapeutiinik Tasiilamukartitsisimavugut soorluttaaq immikkut suliniuteqarnissamut immikkut aningaasaliissuteqartoqarsimasoq.

Ny struktur

Ukioq kingulleq aprilip qaammataani kommuni meeqqat pillugit sulianik misissuisartussanik pilersitsivoq. Tamanna Namminersorlutik Oqartussat nakkutilliinermik nalunaarusiaani meeqqat pillugit suliat uninngatiinnarneqartut paasineqarnerata kingorna pivoq.

Piviusulersaarutillu immiunneqarnerata nalaani Tasiilami innuttaasut allannguutinik malugisaqanngillat.

- Suliniutit annertusarneqarnerata kingorna ingerlaannaq malugineqarnissaat tamatta kissaatigaarput. Ajoraluartumillu allannguutit sunniuteqarnissaannut piffissaq ingerlaqqaassaaq, Randi Vestergaard Evaldsen (D) oqarpoq.

Kommuni ingerlatsivimmi aningaasanik atuineruleraluartoq angusat allannguuteqarpallaarsimanngillat. Tasiilamilu atorfiit inuttaqanngitsut ukioq ataaseq sinnerlugu inuttalerneqarsimanngillat.

- Isummat nutaat pisariaqartippagut, Kommuneqarfik Sermersuumilu borgmesterip sinniisaatut qanoq allatut iliortoqarsinnaaneranik isummersortoqarnissaanut tamanut ammavunga. Piviusulersaarummi peqataasut oqaloqatigisinnaallugit neqeroorutigaara, Randi Vestergaard Evalsen (D) neriorsuivoq.

- Piviusulersaarut iliuuseqartariaqarnertut tigussavarput. Politikkeritut qinikkatullu qimarratiginninnata akisussaaffik tigullugu iliuuseqartariaqarpugut.

- Naaggaassaagut.

Taassuma erseqqissaatigaa, Tasiilami taamaallaat ajornartorsiortoqanngimmat.

- Ilanngullugu erseqqissaatigerusuppara, Tasiilamiinnaq ajornartorsiortoqanngimmat. Nuna tamakkerlugu ajornartorsiutaavoq aatsaallu ataatsimoornikkut aningorneqarsinnaapput. Kinguaassiutitigut kanngutsaattuliortarnerit imminullu toquttarnerit amerlaqisut naaggaassavagut.

- Kinguaassiutitigut kanngutsaattuliortarnerit, imminut toquttarnerit kiisalu imigassamik ikiaroornartumillu atornerluinerit pinaveersaartinnissaannut periutsinik nutaanik pisariaqartitsivugut. Taakkumi imminut atakkajuttarput.