Borgmester: Unioqqutitsilluni qassusersorneq unitsinneqarli
Borgmester Palle Jerimiassen naapertorlugu Avannaata Kommuniani unioqqutitsilluni qassusersorluni qaleralinniartoqartarpoq, tamannalu unitsinneqartariaqartoq, nalunaaruteqarpoq.
Avannaata Kommunia tusagassiutinut nalunaaruteqarluni ilisimatitsivoq unioqqutitsilluni qassusersortut qulinit amerlanerusut ilisimaaralugu. Taamaattoqarnera borgmester Palle Jerimiassenip qisuariarfigaa.
- Ilulissani aalisartut kaammattorumavakka Ilulissat kangerluani unioqqutitsilluni qaleralinniarnerit maanna unitsissagaat, taamatullu qassutiminnik qaqitsissasut, oqarpoq.
Palle Jerimiassen Sermitsiaq.AG-mut ilisimatitsivoq najukkami aalisartut peqatigiiffiisa saaffiginninneratigut ajornartorsiummik ilisimannilersimalluni.
Maleruaqqusat 6. september 2011-meersut naapertorlugit qassusersorluni qaleralinniarneq inerteqqutaavoq, taamaaliorlutillu aalisartut piaartumik unittariaqartut, kommuni ilisimatitsivoq.
Nalunaarutigineqartut
Borgmesterip Aalisarnermut Akuersissutinik Nakkutilliisoqarfik sapaatip akunnerata siuliani pissutsit pillugit attaveqarfigisimallugit. Souschef, Niels J. Laursen, uppernarsaavoq saaffigineqarsimallutik, suliaq misissorneqassasoq ilisimatitsivoq annerusumilli oqaaseqarsinnaanani.
Avannaata Kommuniani borgmesterip aalisartut malittarisassanik piaartumik malinneqquai.
- Qassusersorneq unitsinneqanngippat aalisartut tamarmik – ileqqoreqqusamilluunniit aamma malinnittut eqqornerlunneqassapput, taamaliornerlu aalisartoqatinik ataqqinninngitsuliornerussaaq namminerlu inuuniutigisamut suusupaginninnerulluni, oqarpoq.
Taamaammat qassusersorluni qaleralinniarneq siunissami illersorneqarsinnaassappat aammalu qassusersorluni qaleralinniarnerup matusaasinnaanera aalisartunut tamanut kingunerluttumik eqquissanngippat aalisarnermik inuussutissarsiuteqartut tamakkerlugit matumuuna kaammattorpakka
akisussaassuseqartumik qaleralinniarnermut ileqqoreqqusamik malinneqqullugit, nalunaarutigineqarpoq.
- Qassusersorluni qaleralinniarnermik mattusinissaq pissanngippat aamma aalisartoqatinut eqquinerlunnissaq pinaveersaarluinnartariaqarpoq, taamaattumik ilungersorlunga upiumaffigaassi qassutit Ilulissat kangerluata iluaniittut qaqeqqullugit, Palle Jerimiassen oqarpoq.