Borgmester: Nuummi akisuumik aaqqiissuteqarnerit nunap sinneranit akilerneqartarput
Qeqqata Kommuniani borgmesterip Malik Berthelsenip illoqarfiit pingaarnersaanni Namminersorlutik Oqartussat piginneqataaffiinik pilersitsisoqaraangat pisortat aningaasarsiaat nunap sinneranit akilerneqartarnera ajuusaarnartippaa.
Mittarfissat nutaat pingasut sinaakkutissaannut tusarniarniaanermut akissuteqaammi, Siumup Sisimiuni borgmesteriutitaa, Malik Berthelsen, isornartorsiuvoq.
Aaqqiissut akisullunilu ilungersunartoq
- Ukiuni kingulliunerusuni inissiaatileqatigiiffiit Nuummi qullersaqarfilerlugit pilersinneqartut arlaqarput, naallu Royal Artic Linep-p qullersaqarfia illoqarfiit pingaarnersaanniikkarluartoq, nunamilu umiarsualiviit sinnerinik ingerlatsingaluartoq, nunatsinni umiarsuavliviit annersaat nutaaq Sikuki-p ingerlataraa, Malik Berthelsen allappoq tusarniaanermullu akissuteqaammi erseqqissaalluni:
- Taamaalilluni tamanna allaffissornikkut ilungersunarlunilu akisuvoq, tamannalu Namminersorlutik Oqartussat anguniarpaa, inatsisissatullu siunnersuutitigut aamma anguniarneqarluni.
Ingerlatseqatigiiffik ataaseq naammappoq
Malik Berthelsen isumaqarpoq, nunami mittarfiit ingerlatseqatigiiffinnit Kalaallit Airportsimi Mittarfeqarfinniillu pinnatik Namminersorlutik Oqartussat ingerlatseqatigiiffiutaanit aqunneqartariaqartut.
- Qeqqata Kommuniani mittarfiit, Namminersorlutik Oqartussat Qeqqata Kommunialu piginnittoralugit, ilaatigut namminersortut piginneqatigisinnaallugit, ingerlatseqatigiffimmut ataatsimut aamma tunniunneqarsinnaapput, Malik Berthelsen siunnersuuteqarpoq.
Nalunaarusiamik ujartuisoq
Tusarniaanermut akissuteqaammi borgmesterip – Sulisitsisut tusarniaanermut akissuteqaataat assigalugu – mittarfiit nutaat pingasut inuiaqatigiinnut qanoq iluaqutaatiginerannik takussusiisussamik inuiaqatigiit aningaasaqarnerinut sunniutigisassaanik nalunaarusiaq ujartorpaa.
- Siunnersuummut atortut pissarsiarisinnaatinnagit Qeqqata Kommuniata inatsisissatut siunnersuut oqaaseqarfigiuminaatsippaa, Malik Berthelsen isumaqarpoq.