toqusoqarneq
Borgmesteriusimasoq Vittus Mikaelsen toqukkut qimaguppoq
Vittus Mikaelsen sivisuumik napparsimareerluni pingasunngornermi toqukkut qimaguppoq. Taanna 66-nik ukioqarpoq.
Ammassalimmi borgmesteriusimasoq Vittus Maaru Mikaelsen (S) 66-nik ukioqarluni toquvoq.
Taanna piffissami sivisuumik napparsimareerluni pingasunngornermi toqukkut qimaguppoq, Kommuneqarfik Sermersooq allappoq.
1997-imiit 2008-mut borgmesteriuvoq taamaalillunilu Ammassallip Kommunia 2009-mi Kommuneqarfik Sermersuumut ilanngunnissaa sioqqullugu kingullersaalluni borgmesteriulluni.
Ikaarsaariarnermut Ataatsimiititaliamut 2008-mi qinigaavoq qinigaaffiusunilu marlunni 2017-imi apriilip tungaanut kommunalbestyrelsimut ilaasortaalluni.
Vittus Maaru Mikaelsenittaaq Siumut sinnerlugu qinigaaffinni arlalinni Inatsisartunut ilaasortaavoq. Siullermik 1999-imi qinigaavoq.
Vittus Maaru Mikaelsenip qimagarai nuliani, meeqqani sisamat ernuttanilu arfineq marluk.