Borgmesteriujunnaartoq: Pisoq ilikkagaqarfigisariaqarparput

Kiista P. Isaksen Kommuni Kujallermi borgmesteriunini attatiinnanngitsoorpaa,nuannaarutigaali borgmesteriunermini Siumup kommunimi angusarpassui.

Kuannersuarnut suliniut peqqutaanerpaalluni kommunimilu allannguerusuttoqarnera
qineqqusaarnermi initunikuuneri peqqutaallutik, qineqqusaarnerup ingerlanerani
ilimatsaatereersimavaa Kommuni Kujallermi pissaaneq tigummiinnarsinnaassagunarnagu.

Taamaammat Kiista P. Isaksenimut tupallataavallaanngilaq ukiuni sisamani kingullerni
borgmesteriuffigisimasamini Inuit Ataqatigiit kommunalbestyrelsimut
isertitaqarnerpaammata. Aviisi Sermitsiaq allappoq.

- Inuit Ataqatigiit pilluaqqorujussuarpakka taama kusanartigisumik taaneqarsimammata. Qineqqusaarnermi Kuannersuarni suliniut uranilu assut initunikuupput, taamaammat aamma Narsami taama qinigaatigipput. Politikki taamaappoq, ajugaasoqartarpoq ajorsartoqartarlunilu, kisianni ajorinngilluinnarpara aamma borgmesterinngoqqinnginnama.

- Taamatut pisoqariaannaannera ilimatsaatereersimavara, taamaammat aamma piareersimaffigivara. Innuttaasut allanngortoqarnissaanik kissaateqarnerat assut ersarissimavoq, aamma Kuannersuarnut suliniut assut eqqumaffigisimavaat, Kiista P. Isaksen oqarpoq.

Borgmesteritut sulisimanerpit iluatsissimannginneranik qinersinerup inernerata takutippaa?

- Qinersinerup inernera qinersisartut naliliinerivaat. Taasisartorpassuarnik annaasaqarsimavunga, taassumalu takutippaa innuttaasut uannut qanoq isumaqarsimanersut, Kiista P. Isaksen oqarpoq.

Borgmesterip akissutai tamaasa qinersinerlu pillugu allat aviisimi Sermitsiami atuakkit, ugguuna iserfigisinnaavat:

Powered by Labrador CMS