Borgmesterit: Akiligassaq qanoq annertutigissanersoq suli naluarput

Kommunit tamarmik assigiissutigaat ukioq manna akileraarutitigut isertitassat naatsorsuutigisamit ikinnerungaatsiassasut. Taamaattorli akileraartarnitsinnut siuttorput Qujaukitsoq neriorsuivoq, aningaasanut inatsit naapertorlugu akileraarutitigut isertitassatut missigersuutigineqartut naapertorlugit kommuninut tunniussisarneq ingerlaannassasoq, aamma corona pissutaalluni isertitat ikinnerugaluarpataluunniit. Tassa aallaqqaammut nunatta karsiata annaasaqassaaq kingusinnerusukkullu kommunit akiligassaq akilerumaarpaat

Kommuneqarfik Sermersuup aningaasartuutigisartakkani sukumiisumik nalilersoqqittariaqassagai sipaarniutaasinnaasunik ujarlerluni allaqqutassaarpasinngilaq.

Nunatsinni kommunit tallimaasut missingersuutaat naapertorlugit inummut akileraarutitigut isertitassat ataatsimut katikkaanni 2,8 milliard koruunit ataatilaarpaat. Taamaattorli nunatsinni borgmesterit nalunngilaat isertikkumaakkatut missingersuutigisatik attanneqarsinnaanavianngitsut, tassami kommunini tamani inuussutissarsiutinik ingerlataqartut ilarpassui coronap susinnaajunnaarseqqanikuugamigit.

Sermitsiamit apeqqutit assigiinngitsut kommunit ingerlanneqarnerinut tunngassuteqartut pillugit nunatsinni borgmesterit paasisassarsiorfigaagut. Akissutigineqartut ataatsimut isigalugit paasinarpoq corona pissutaalluni annaasat aningaasanngorlugit tagginneqarnissaannut maanna siusippallaartoq. Taamaattorli borgmesterit tamarmik sillimaffigaat akileraarutitigut isertitassarpassuugaluit ilaat annaaneqartussanngormata, suliffissaaleqinermi kommunini tamani qaffariaateqarpoq. Taamaattroli nunatsinni kommunit pisuunersaat, Kommuneqarfik Sermersooq missiliuteqarpoq maannamut annaasat qanoq amerlatigisimassanersut.

– Annaasaq annerpaaq tassaassaaq akileraarutitigut isertitassaagaluanik annaasaqarnissarput aammalu suliffissaaleqinermik eqqugaasunut aningaasartuuteqarnissarput. Piffissap imaalinerani naatsorsuutigigallarparput 2020-mi kommunitsinnut 100 millioner koruuninik annaasaqartussaassalluta ajornartoornerup kingunerisaanik. Taakkunannga amerlanerpaat akileraarutitigut isertitassaagaluit annaasanut tunngassuteqarput, Kommuneqarfik Sermersuumi borgmesteri Charlotte Ludvigsen (IA) Sermitsiamut oqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS