Borgmesteri: Siumut siunertaa sangujoraarpoq
Nunami inuttaqassutsikkut kommunit annersaanni, Kommuneqarfik Sermersuumi borgmesterinngorniunnissaq aallartilaavissorpoq. IA sinnerlugu borgmesterip Charlotte Davidsenip Siumukkormiut Nuummi inissaaleqisoqarnera aaqqiiffiginiarlugu suliniut pineqartillugu isumaat allanngorarnerarpai.
Nuummi Siumup immikkoortortaqarfiani siulittaasoq Inga Dora Markussen isumaqarpoq, illoqarfiit pingaarnersaanni inissaaleqisoqarnerata aaqqiiffigineqarnissaa, apriilip arferani kommunimut qinersisoqareerpat suliassat pingaarnerit ilagigaat, taanna neriuppoq borgmesterinngorumaarluni.
Siumumi politikkerip Nuumilu Siumut siulittaasuata januaarip pingajuani Sermitsiaq.AG-mit apersorneqarnermini oqaatigaa Nuummi ineqarniarnikkut ajornartorsiuteqarneq "namminersortut inissialiornissamut aningaasaliissuteqarusuttut pinngitsoorsinnaannginnerannut sanilliullugu assigiinngitsunik suliniuteqarnikkut aaqqiiffigineqassaaq”.
Siumut periutsimut akerlilersuisoq
Taamatut oqaaseqarnerata Charlotte Ludvigsen qisuariartippaa:
- Amerlanernik inissiaqalernissaq qulakkeerniarlugu aqqut ersarissoq takutippara. Sanaartortartut namminersortut inissialiorput kommunemut attartortitsinissamik siunertaqarlutik. Tamanna tunngavilersorluakkamik takutitsivoq inissianik qassinik sanasoqarsinnaanersoq tamannalu kommunemut aningaasartuut akikippoq. Periuseq ullumikkumut Siumumiit akerlerineqarpoq, borgmesteri ukiut arfinillit tulliuttut ingerlaneranni inissanik nutaanik 1.850-inik sanaartortoqarnissaanik pilersaaruteqartoq erseqqissaavoq.
- Maannakkorpiaq Naalakkersuisut Siumumik siuttullit peqqussutaat peqqutaalluni periuuserput ajunngikkaluartoq uagutsinnik kommuninillu allanik atorneqarsinnaanngilaq. Naalakkersuisut isumaqarput uagut kommunetut suliassarinngikkipput innuttaasutta inissaqartinneqarnissaat – kisianni qanoq isilluni uaguussanngila innuttatsinnut
inissaqartitsinissaq? Isumaqanngilaq., IA sinnerlugu borgmesteri erseqqissaavoq.
Siumumi avissaartuuttoqarpa?
Charlotte Ludvigsenip nuannaarutiginerarpaa, Siumumi politikkerip Inga Dora Mikkelsenip inissaaleqisoqarnera oqaluuserisassanngormagu, aperivorli:
- Siumut tamanna aaqqinniarnerpaat? Uani apeqqummi Siumut iluminni isumaqatigiinnginnerpat? Imaluunniit Siumut partiitut kiisami killormorpiaq isumaqalersimapput suleqatigiinnikkullu inissaaleqineq
aaqqiissuteqarfiginissaanik suleqataarusulersimallutik?
- Taamaammat suli ujartorpara Siumukkut qanoq inissaaleqineq aaqqiiviginiarneraat? Pilersaaruteqarpunga maannakkumut inissianik nutaanik 501-nik pilersitsereertumik siunissamilu aamma inissianik nutaanik 1.850-nik ilaqqittussanik. Taamaattoq maannakkumut Siumut taamaallaat siunertaq sangujoraartoq takutippaat. ullumikkut borgmesteriusoq erseqqissaavoq.
Siumut unnummut ataatsimeeqatigiinniartoq
Inga Dora Markussenip Sermitsiaq.AG-mut ilisimatitsissutigaa, Siumumi kommunalbestyrelsimi ilaasortaatitat unnummut ataatsimeeqatiginiarlugit, tassani siunissami ineqarnermut politikkissaq oqaluuserineqassalluni. Taamaammalu Namminersorlutik Oqartussat maanna periuserineqartumut tunngatillugu peqqussuteqarnermikkut iliuuseqarsimatillugit, "ineqarniarnikkut ajornartorsiutip" siunissami qanoq aaqqiiffigineqarsinnaaneranut Siumup pilersaarutaa sapaatip akunnerani matumani kingusinnerusukkut aatsaat erseqqissaaffiginiarpaa.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...