Borgmesteri: Piffissaq misileraaffiusoq Nuup avataaneersut siunnersuutaannik akuersissutigineqartunik arlaqarnerusunik qulakkeerinnissasoq
Kommuneqarfik Sermersooq aalajangersimavoq, piffissamik misileraaffiusumik atuutilersitsiniarluni, tamatumanilu innuttaasutut siunnersuutit taasinernik 250-inik piumasaqarfiujunnaarlutik 50-iinnarnik taasisoqarsinnaalissasut.
- Innuttaasut siunnersuutitsialaminnik politikerinut anngussisarnissaat kommunalbestyrelsimi issiasunut pingaaruteqarpoq.
Taama Kommuneqarfik Sermersuup borgmesteria, Avaaraq S. Olsen, oqarpoq.
Taamatut oqaaseqarpoq kommunimi aalajangertoqareersorlu siunnersuutit Nuup avataaneersut 50-inik taaneqarsimatillugit ataatsimiititamut susassaqartumut ingerlateqqinneqartarnissaat misileraaffigineqassasoq.
Nuummiinnaq suliniutit
Piffissaq misileraaffiusoq decembarip 1-anit qaammatini pingasuni atuutissaaq.
- Taamaammat misileraanerup nalaani innuttaasut sunik siunnersuuteqassanersut takussallugu pissanganartippara, borgmesteri tusagassiuutitigut nalunaarummi oqarpoq.
2020-miilli Kommuneqarfik Sermersuumi innuttaasut, kommunip innuttaasunik peqataatitsinermut nittartagaatigut siunnersuuteqarnissamut, periarfissaqalernikuupput.
Kommuni naapertorlugu, arlallit periarfissaq atorluareerpaat siunnersuuterpaaluillu politikkikkut oqaluuserisassanngortinneqarsimallutik.
Siunnersuutit pineqartut maannamut 250-inik amerlanerusunik taaneqartut Nuummiinnaq pisussatut siunnersuutaasarput, kisitsisillu pineqartut taasinikkut qaangeraangamikkit ataatsimiititamut susassaqartumut ingerlateqqinneqartarput.
Ilaatigut taamaattumik siunnersuutinut Nuup avataaneersunut atsiornerit amerlassusissaannut piumasaqaatip appartinneqarnera maanna misilinneqalerpoq.
Illit nammineq siunnersuutinnik saqqummiussisinnaavutit imaluunniit allat siunnersuutaannik taasisinnaallutit uani.