Borgmesterip qaleralinniarlutik aalisartut pakatsisittariaqarai

Aalisartut qassusersorlutik qaleralinniarnerup sivitsorneqarnissaanut immikkut akuersissummik qinnuteqarnerat, Avannaata Kommuniani kommunalbestyrelsep itigartippaa.

Avannaata Kommuniani qassusersorluni qaleralinniarneq unitsinneqangajalerpoq. Kommunimmi maleruagassai malillugit aalisartut januaarimiit apriilip naanerata tunganut qassusersorlutik qaleralinniarnissaminnut periarfissaqartinneqarput.

Qassusersorlunili qaleralinniarnerup sivitsorneqarnissaanut immikkut akuersissummik aalisartut arlallit qinnuteqarsimapput.

Itigartinneqartut

Qinnuteqaatit Avannaata Kommunianit itigartinneqartut, borgmester Palle Jerimiassen (S) tusagassiutinut nalunaaruteqarluni allappoq.

- Maleruagassat allanngortinneqassanngikkuni akuersissutaareersimasut naleqqiullugit suli annermik immikkut akuersissuteqarnissaq inatsisaasut malillugit periarfissanngilaq. Taamaammat kommunip Kommunip qinnuteqaat imaaliallaannartumik suliaqarfigisinnaanngilaa, sinerissap qanittuani qaleralinniarneq pillugu nalunaarut tamatumunnga tigussaasunik killilersuimmat, Palle Jerimiassen allappoq.

Qassusersorluni qaleralinnik aalisarneq aallaaviatigut inerteqqutaavoq, kommunilli maleruagassai malillugit immikkut akuersissuteqartoqartarpoq. Immikkullu akuersissuteqarsimaneq maanna qaangiutingajalersoq, borgmesteri erseqqissaavoq.

Maleruagassat nutaat

Aalisakkap pilerigineqarluartup aalisarneqarnera ukiup qanoq ilinerani aalajangersimasumik inissisimasarpoq. Aalisartut ukiuunerani qimussimik qamuteralannilluunniit aalisariartarput, aasaaneranilu umiatsiaararsortarlutik.

Kommunimi avannarlermi innuttaasut 30 procentiisa missaat aalisarnermik toqqaannartumik toqqaannanngikkaluartumilluunniit inuussutissarsiuteqarput. Tassa ilaat aalisartuugamik, allallu aalisakkerivinni suliffeqaramik.

Palle Jerimiassen ilisimatitsivoq kommuni maleruagassanik nutaanik suliaqarnermik ingerlataqartoq, taakkuli aatsaat ukiuunerata tullissaanut atuutsinneqalersinnaassasut.

Powered by Labrador CMS