Borgmesterip matoqqasoqarneraasoqarnera illuatungilerpaa

Narsarsuup siunissaa pillugu suleqatigiissitami ilaasortaasut suliap ingerlanerani nipangersimasussaatitaanerat ippinnartortaqanngilaq. Kommune Kujallermi borgmesteri, Kiista P. Isaksen (S) tusagassiutinut nalunaarummini, 'Matup tunuani sulinata kommune ataasiusoq sullipparput'-mik qulequtsersimasamini allappoq.

Suleqatigiissitap suliassaani allassimavoq 'suleqatigiissitap suliani kiisalu paasissutissat inerniliussallu taassuma malitsigisai isertuulluinnassavai'.

Taamali allanneq matumik matoqqatitsinerunngilaq, Kiista P. Isaksen (S) isumaqarpoq.

- Suleqatigiissitap suliaminik politikkikkut oqartussanut saqqummiussinnginnerani ilaasortat eqqissillutik sulinissaat siunertaralugu matoqqasumik sulinissaq siunniunneqarsimavoq, kialluunniimmi pingaaruteqartunik suliaqarluni misilittagaqartup ilisimasarpaa suliap naammassinissaata tungaanut nipangersimasussaatitaaneq nalinginnaasuusoq; suliaminnilli saqqummiussinerat isertugaataanavianngilaq, tassanngaanniilllu sulineq ingerlariaqqissinnaanngorumaarpoq , tusagassiutinut nalunaarummini allappoq.

- Suliassat akuerineqarput

Kommunalbestyrelsemi IA sinnerlugu ilaasortap, Stine Egedep suleqatigiissitami isertuussinissaq isornartorsiorpaa. Taanna aamma isumaqarpoq Kiista P. Isaksen kommunalbestyrelsemik naammaginartumik peqataatitsinani suleqatigiissitaq pillugu atsiorsimasoq. Borgmesterip tamanna akerlilerpaa.

- Suleqatigiissitamik pilersitsinissaq qangali siunniussaavoq, pilersitsisoqarnissaanillu siunniussineq Inatsisartunut qinersisoqartussanngorneranik tunngaveqartumik kigaallassimatinneqarsimasoq septembarip qaammataani 2018-imi pilersinneqarpoq. Suleqatigiissitamik pilersitsineq kommunalbestyrelsimi ilaasortat ilaannit, nunaqarfinni aqutsisunit, Naalakkersuisumit aamma peqatigiiffik Narsarsuaq Piujuarlimit peqataaffigineqartoq nipaarsaarussaanngimmat tusagassiutinut nalunaarutigineqarpoq, kingornalu aamma Kommune Kujallermi kommunalbestyrelsimi ilaasortanut novembarip 28-ani saqqummiunneqareerpoq, soorlu tamanna ataatsimiinnermi imaqarniliami takuneqarsinnaasoq.

- Suleqatigiissitami ilaasortanut aamma politikkikkut aqutsisoqatigiinnut suleqatigiissitap suliassaasa allatorsimaffiat Naalakkersuisuniit suliakkiussaasoq oktobarip qaammataani 2018-imi tusarniutigineqarmat tamanit akuersissutigineqarpoq, taamaammat tusagassiutit nittartakkakkullu attaveqatigiittarfiit aqqutigalugit nipaarsaarluni sulisoqarneranik oqariartuuteqartoqarnera tunngavissaqanngilaq.

Suleqatigiissitap sulinermini isertuussinissaa pillugu Pele Broberg (PN) isornartorsiortunut ilannguppoq.

- Sooruna inuiaqatigiit peqataatinneqarnissat qulaaqqutiinnarlugu, sooruna isertuunniarnersuaq? Taanna tusagassiutinut nalunaarummini allappoq.

Kiista P. Isaksen (S) isumaqarpoq innuttaasut soqutigisaat aallaavigalugit sulisoqartoq.

- Kommune Kujallermi kommunalbestyrelsip pingaartitaraa tatiginartumik aqutsinissaq, tamannalucingerlaqatigalugu kommune ataasiusoq sullipparput, matumani siunertaralugu kommunimi illoqarfimmi nunaqarfimmilu sumiikkaluaruttaluunniit toqqissisimasumik najugaqarnissarput , allappoq.