Borgmesterip Charlotte Ludvigsenip Naalakkersuisut tupigusuutigai: – Inatsisit ilaannaannut atuussimagunarput
Peqqinnissaqarfiup inissaqartitsiniarnermi periuseq kommunip atugaata assinga atorpaa.
Nuussuup aamma Qinngorput killinganni, ikuallaaviup eqqaani inissiat quleriiaanik initaqartut marluk inissisimapput, ingerlatseqatigiiffimmit aningaasaliisartumit namminersortumit Sarfaarsuit A/S-imit sanatinneqartut. Aviisi Sermitsiaq taama allappoq.
Kommuneqarfik Sermersooq aamma Peqqissutsimut Pitsaaliuinermullu Aqutsisoqarfik inissiaqarfinni attartorput. Kommunip inissiat illoqarfimmi innuttaasunut Iserit A/S aqqutigalugu attartortittarpai. Peqqissutsimut aqutsisoqarfiup inissiat peqqinnissaqarfimmi sulisunut vakantitut imaluunniit piffissami sivikitsumi attartortittagarai.
Aningaasaliisartunut namminersortunut akisuumik attartoriarluni akikinnerusumik sulisunut aamma illoqarfiup innuttaasuinut attartortitseqqittarnermik periutsit assigiipput, kisianni assigiinngisitsisoqarpoq.
Kommuneqarfik Sermersooq sapaatip-akunnerani kingullermi Kommunit Nakkutilliisoqarfiannit taamatut periuseqarnerup unitsinneqarnissaanut peqquneqarpoq.
Akerlianik peqqinnissaqarfiup inissiaatilinnut namminersortunut sulisuminnut inissarsiortarnertik ingerlatiinnarsinnaavaa.
Taamatut assigiinngisitsisoqarnera Kommuneqarfik Sermersuumi tupigisuutigineqarpoq.
– Inatsisit allanuinnaq atuuttut Naalakkersuisut isumaqannguatsiarput, borgmesteri Charlotte Ludvigsen oqarpoq.
Periutsip assinga, kisianni…
Kommuneqarfik Sermersooq 2016-miilli inissianik 416-inik aningaasaliisartunut namminersortunut attartorsimavoq, tamatumalu kingorna kommunip inissiaatileqatigiiffiata Iserit A/S-ip inissiat illoqarfimmi innuttaasunut ukiorpassuarni inissarsiorlutik utaqqisunut attartorteqqittarpai.
Kommunip niuernermi akit qaffasissut malillugit attartortarpai, Iserillu inissiat appasinnerusumik attartornermut akiliisitsilluni kikkut tamarmik attartorsinnaasaannik attartortitseqqittarpoq. Taamaalilluni inissiaatileqatigiiffik amigartooruteqartarpoq, tamannalu kommunip amigartoornermut qularnaveeqqummik akilertarpaa.
Atuaruk suliarlu pillugu allaaserisat arlallit uani sapaatip-akunnerani Sermitsiami atuakkit