mittarfiit
Borgmesterip akiligassat 2 milliardit tunuliaqutaat tusarusuppaa
Sooruna Naalakkersuisut tassanngaannartumik Kangerlussuarmi mittarfiup nutarterneqarnissaa annertunerujussuarmik akeqarneraraat? Qeqqata Kommuniani borgmesterip tamanna paaserusuppaa
Qeqqata Kommuniani borgmesterip, Hermann Berthelsenip (S), Kangerlussuarmi mittarfiup siunissamut qulakkeernissaa qanoq naleqassanersoq saqqummiunneqartoq ippassaq uani nittartakkami atuaramiuk tupaallassimaqaaq.
Mittarfissuaq naleqquttunik illutaqartillugu aamma atortoqartillugu ingerlatinniaraanni 2 milliardit koruuninik naleqassaaq.
Atuaruk: Akiligassat milliardit mittarfiit nalorninartorsiortippaat
Kisitsit annertuvoq, kisianni Siumut-borgmesterip pisortatigoortumik allagaqarnermini tupigusuutigaa, sooq angallannermut naalakkersuisup aasaanerani allagaqaatimini akinik allaqqinnaanik minnerusunillu saqqummiussisimanersoq.
Qaffaariapiloorneq
- Kangerlussuarmi 2 milliardit koruunit tikillugit aningaasaleeqqittoqarnissaanik pisariaqartitsisoqartoq taakkartorneqartoq, Hermann Berthelsen allappoq.
- Juulip 28-ani uannut allakkanni 725 mio. koruunit taaneqartut, 2015-imi aggustip arfernani 975 mio. koruunit taaneqartut, 2015-imi aggustip 28-ani Jens-Erimmut allakkanni 2 mia. koruunit taaneqartut eqqarsaatigissagaanni qaffariaat annerstoorujussuuvoq.
Kisitsisit nutaat tunuliaqutaat tusarusukkaa
- Mittarfiup saanilu inissiiviup nutarterneqarnissaanut aningaasartuutissat qaammatip ataasiinnaap iluani 250 mio. koruuninit 1.525 mio. koruuninut qaffariaateqarnerat ernumanarpoq. Taamatut nutaamik naatsorsuisimanermut atortut tigunissaat qilanaaraa, taamaalilluta Kangerlussuup siunissaa pillugu aaqqiissutissarsiorluta pitsaasumik oqaloqatigiittarnigut ingerlateqinniassagatsigit, allakkami Knud Kristiansenimut isornartorsiuerpalaartumi taama nipeqarpoq.
Atuaruk: Akiligassat milliardit mittarfiit nalorninartorsiortippaat