Borgmesterinngulersoq: Kommuni tamarmi ineriartornermut peqataatinneqassaaq

Kommunalbestyrelsemut qinersinerup kingorna Avannaata Kommuniani politikkikkut aqqut allanngorarluinnarsimavoq. Borgmesterip ujamii borgmesteriusimasumit qinikkanut ataasiinnaanngitsumut ingerlaarsimapput. Sakio Fleischer, qinersinermi Siumumit sassartunit taaneqarnerpaat pingajuusoq, politikkikkut pissutsit maannakkutut itsillugit, kommunimi borgmesterinngortussanngorpoq.

Borgmesterinngortussatut innersuunneqartup borgmesteritut issialeruni suliassani siulliit takorloorsinnaalereerpai. Sakio Fleischerip nammineerluni takorusuppai kommunip illoqarfii sisamat ineriartornermi sumut killinnersut.

- Illoqarfiit tamarmik, Qaanaaq, Upernavik, Uummannaq aamma Ilulissat tikeraarneqassapput. Illoqarfinni taaneqartuni innuttaasut kommunalbestyrelsep ilaasortaanik naapitsisinnaanermut periarfissinneqassapput. Inuuniarnermi atukkat, ineriariartortsinermut pisariaqartinneqartut kissaatillu taamaasilluta aamma tusassuagut, Sakio Fleischer Sermitsiaq.AG-mut oqarpoq.

Borgmesteritut ivertinneqarnissaq Sakio Fleischerimut, 53-inik ukiulimmut, qaninnerulluinnalersimavoq Palle Jerimiassen 338-inik taaneqarsimasoq partiimit tunuarmat, taamatullu Minik Høegh-Dam taaneqarnerpaagaluarluni borgmesterissatut innersuunneqarnerminit tunuarmat, ikiaroornartoq pillugu inatsimmik unioqqutitsisutut unnerluuneqarluni eqqartuunneqarnissani pillugu.

Avannaa avinngarusimalluinnartoq

Sakio Fleischer naapertorlugu Avannaata Kommuniani illoqarfiit avannaaniittuni innuttaasut qinikkanik tikinneqartarnissaminnik kissaateqarput. Kommunalbestyrelsetullu ivertinneqartussat tamanna siullertut naammassiumavaat.

Fleischer Qaasuitsup Kommuniani kommunalbestyrelsemi 2013-imiilli ilaasortaasimavoq, kommunerujussuarlu avinneqarmat Avannaani aamma ilaasortaalluni. 2019-imiit 1. viceborgmesterinngorpoq.

Politikkikkulli anguniagassat maanna inissititerneqartussanngorput.

- Qineqqusaarutigereernermi suliarerusutagut taasareerpagut. Tassa ineqarneq, inuuniarnermi atukkat, meeqqat inuusuttullu atugaat, utoqqaat pisariartitsisullu atugaat kiisalu inuussutissarsiorneq. Taakku politikkikkut anguniagassani pitsanngorsagassatut maanna oqaloqatigiissutigissuagut, borgmesterinngulersoq nassuiaavoq.

Suleqatigiinnissamut ammasoq

Siumut aamma Naleraq Avannaata Kommuniani suleqatigiissallutik isumaqatigiissusioreerput. Isumaqatigiissut malillugu Siumut borgmesteriutitaqassaaq Nalerarlu 1. viceborgmesteriuteqarlunilu kulturimut ataatsimiititaliami siulittaasuuffeqassalluni.

Isumaqatigiissullu isumaqatigiissutaavoq. Sakio Fleischerili oqaluttuarpoq kommunalbestyrelsep iluani partiit akimorlugit suleqatigiittarnerit takornartaanngitsut.

- Takornartaanngilaq partiit tamarmik kommunalbestyrelseni suleqatigiittarneri. Naleqqamut maanna isumaqatigiissuteqarpugut, tamannali partiinut allanut kommunalbestyrelsemi suleqatigiinnissamut mattussinerunngilaq. Sammisani assigiinngitsuni suleqatigiittassaagut, oqarpoq.

Fleischer ilisimatitsivoq kommunalbestyrelsep inissititerluni ataatsimiinnerani politikkikkut anguniagassat pillugit isumaqatigiissut atsiorneqassasoq. Inissititerluni ataatsimiinnissaq ullulerneqassaaq qinigaasinnaanermut ataatsimiititaliaq qinikkat pillugit aalajangeereerpat.