Borgmesterinngorneq imaluunniit: Peter Olsenip Múte oqaluuteqqaarusuppaa
Inuit Ataqatigiinnit Peter Olsen Inatsisartunut aamma kommunimut qinersinermi taaneqarluarpoq. Kommune Qeqertalimmi borgmesterinngussanerluni suli aalajangiusimanngilaa.
Peter Olsen (IA) Inatsisartunut aamma kommunimut qineqqusaarpoq.
Kommunimut qinersinermi taaneqarnerpaavoq, 422-nit qinerneqarluni. Aamma Inatsisartunut iserpoq, tassani 255-nit qinerneqarluni.
- Misigisaq tupinnaqaaq, taama amerlatigisunit taaneqarsimanera suli upperiuminaatsippara, Peter Olsen Sermitsiaq.AG-mut oqarpoq.
Qinersinissaq oqinngitsoq
Kommune Qeqetalimmi borgmesterinngornissani takorloortarsimallugu oqarpoq.
- Kisianni aamma Naalakkersuisunut ilaasortanngornissaq kissaatigisarpara. Naalakkersuisutut atorfissaqartillunga Múte Bourup Egede sianissappat nalorninartumi inissisimalissaanga. Qinersinerit taakku marluk qanoq inerneqarneri tupinnaqaaq, maannakkut pilluaqaanga taama angusarissaartigigama, oqarpoq.
Suli aalajanginngitsoq
Peter Olsenip ilaquttani qaninnerit aamma Inuit Ataqatigiinni siulittaasoq oqaluulluaqqaarlugit aalajangerniarpoq qanoq iliorniarnerluni.
- Maannakkuugallartoq borgmesterinngornissara imaluunniit Naalakkersuisunngoratarsinnaanera suli aalajangiusimanngilara, tamanna unneqqarillunga oqaatigissavara. Aamma qinersisikka pakatsisikkusunngilakka, taamaattumik eqqarsarluartariaqarpunga, Peter Olsen oqarpoq.
Kommune Qeqertalimmi, allareernitsitut, qinerneqarnersaavoq 442-nit taaguunneqarluni. Qinigaaffimmi kingullermi borgmesteriusoq, Ane Hansen, 387-nit taaguunneqarpoq.
Kommunimi tassani Inuit Ataqatigiit kommunalbestyrelsimi qulingiluanik ilaasortaqalerpoq, Siumut sisamat, kiisalu Demokraatit aamma Atassut tamarmik ataatsimik ilaasortaatitaqalerlutik.