Borgmesterinngorlaaq: Pisarsimasut aporaaffiusarumaarput

Avaaraq S. Olsen (IA) illoqarfiit pingaarnersaanni sapaatip-akunnerani kingullermi borgmesterinngorpoq, marlunngornermilu ileqquusumik Nuutoqqami inuiattut ullorsiornerup nalliuttorsiutigineqarnerani siullermeersumik oqalugiaateqarluni.

Politikkerip, Charlotte Ludvigsen (IA) pappialanik kommunip asfaltiliorfimmik 20 millioner koruuninik akiliilluni pisiaqarnissaanut pituttuisumik atsiorsimanera tamanut saqqummiunneqarnerata kingorna borgmesteritut tunuartoq taarserpaa. Pisiaqarnissaq kommunip aningaasaqarnermut ataatsimiititaanit akuerineqarsimavoq.

Asfaltiliorfik pillugu suliaq kommunip ingerlatsisimaneranik iluarsaassinermut atatillugu Kommuneqarfik Sermersuumi kanngunartuliaasimasut arlallit ilaattut saqqummiunneqarsimavoq.

Borgmesterinngorlaap marlunngornermi oqalugiarami erseqqissaassutigaa, suliassamik annertuumik tigusisimalluni:

Tatiginninneq eqqissisimanerlu uterteqqinneqartariaqartut

- Ukioq ataaseq kanngunartuliorfiullunilu eqqissiviilliorfioreermat, tatiginninneq eqqissisimanerlu uteqqittariaqarput, borgmesteri ilaatigut oqarpoq, nangillunilu:

- Allanik saqqummertoqaqqissanngitsoq neriorsorsinnaanngilassi, aamma kukkussananga
neriorsorsinnaanngilassi, kisiannili neriorsussavassi, kukkunernik nassaarineqartunik tamanik tamassinnut aamma kommunalbestyrelsimut saqqummiussisarumaarama.

- Aamma allatulli suliat naammassinissaat kissaatigaara, taamaalillunga suliassat angorusutakka aallussinnaassagakkit, kisiannili aamma ilisimavara pisarsimasut aporaaffiusarumaartut, tamatumunngali ikiuukkusuppunga tapersersuerusullungalu, Avaaraq S. Olsen oqarpoq.

Stine Egede: Sorsuttoqarnerata kinguneri misigivagut

Kommuni Kujallermi borgmesterip Stine Egedep innuttaasunut oqalugiaammini Ukrainemi sorsuttoqarnera ilannguppaa:

- Nunarsuatta ilaani allani sorsuuttut ungasikkaluaqalutik uaguttaaq eqqorpaatigut. Sorsunnerup amiilaarnartuinik, navianartunik aseruingaarnernillu misigisaqanngikkaluarpugut.

- Nunarput eqqissisimaffiugaluartoq taamaattoq akit qaffakkiartornerisigut sorsunnerup kinguneri misigaavut - tamattalu pinngitsoornata misigilerumaarpavut, Stine Egede oqarpoq, nangillunilu:

- Neriuppunga peqatigiilluta ilungersunartut akiorumaarivut, nunalerinermi, aalisarnermi, inuussutissarsiutinilu allani akiugassarigutsigit, imaluunniit innuttaasutut nalinginnaasutut akiugassarigutsigit assigiimmik. Qularnaatsorlu aana: Kulturerput tassaavoq ataqatigiiffipput, suleqatigiinnitsinnik pilersitsisoq, tassalu allanngutsaaliugassarput. Ullumilu tassa taamaaliorpugut!