Borgmesteri: Namminersortut Kangerlussuarmi 1 milliardinik aningaasaleerusupput

Mittarfik attatiinnarneqassappat namminersortut Igaffiup Qaqqaani akunnittarfiliorniarput, Sisimiunullu aqqusinniortoqassappat unnuiffinnik arlalinnik sananissaminnut piareersimapput

Qeqqata Kommuniami borgmesteri Malik Berthelsen (S), 2017-imi maajimi borgmesterinngoramili Kangerlussuup Sisimullu akornanni aqqusinniortoqassappat ingerlatsivinnik takornarialerisunik aningaasaliisunillu siunertatut nalunaarummik atsioqatiginnippoq.

– Sisimiut Kangerlussuullu akornanni aqqusinniortoqassappat ataatsimoorlutik akunnittarfinnik, unnuisarfeeqqanik illuaqqanillu, katillugit 838-inik inissalinnik sananiarput, taanna oqarpoq nassuiaavorlu tamakkua agguataarneqarsinnaasut Kangerlussuup eqqaani tamaanilu aqqusinerni pioreersuni unnuiffissanut 386-inut, Tasersuup eqqaani unnuiffissanut 146-nut aammalu Sisimiut Aqqutikitsullu eqqaanni unnuiffissanut 306-inut.

Nalornineq

Nunaqarfimmut mittarfeqarfimmut taassumalu siunissaa qulaajarniarlugu qaqugu tikeraarnissaat ullulerneqarsimanngilaq. Tamanna aningaasaliisunut nalorninartorsiortitsilerpoq.

– Tamanna pissutigalugu Kalaallit Nunaata maanna aningaasaliissutissat annaasinnaavai, pissutigalugu Kangerlussuup siunissaa nalorninartoqarmat (taamaassimallunilu USA-p ukiut 26-t matuma siornatigut matummaguli), aammalu pissutigalugu sinerissamut ingerlaqqinnissamut attaveqaateqanngimmat, borgmester Malik Berthelsen (S) oqarpoq.

Aningaasaleerusussuseq

Qeqqata Kommuniata naatsorsuutigaa siniffissat sananerat, ataatsimoortarfiit soorlu neriniartarfiit, isersimaartarfiit ilaallu ilanngullugit assiginngitsorujussuarmik akeqassasut, akunnittarfiliorneq, unnuisarfeeraliorneq illuaraliornerluunniit apeqqutaalluni.

– Aqqusinniortoqassappat namminersortut katillugit 1 milliard koruuningajannik aningaasaliiniarput. Tassa aqquserngup 400-500 millioner koruuninik akeqartussap sananeqarnerata saniatigut 1 milliard koruuninik, Malik Berthelsen (S) oqarpoq.

Allaaserisaq tamaat Sermitsiami saqqummeqqammertumi atuaruk. Aviisi uani pisiariuk:

Powered by Labrador CMS