Borgmesteri: - Naalakkersuisut umiarsuarnik takornariartaatinik takornariarneq annertuumik sukateriffigisariaqarpaat
Kommune Kujallermi borgmesteri Stine Egede Naalakkersuisunut kajumissaarivoq umiarsuit takornariartaatit tulassinnaanerannut erngerlutik killiliisariaqartut. Nunatsinni illoqarfinni nunaqarfinnilu ataatsikkut tulassinnaanissaq annerpaaffilertariaqarpoq.
Kalaallit Nunaanni sumiiffinni najugaqartut aamma qatsuppaat piffissap ilaani umiarsuarmik takornariarpassuit takkusuuttarnerat, illoqarfimmi nunaqarfimmilu kiffartuunnissaannut attaveqaasersuutit piareersimanngitsut.
Aviisi Sermitsiaq taama allappoq.
Kommune Kujallermi borgmesterip Stine Egedep, IA, umiarsuit takornariartaatit mattunnianngilai. Naalakkersuisunulli kajumissaarivoq sapinngisamik tuaviornerpaamik takornariaqarnermut inatsimmik nutaamik pilersitseqqullugit, tulattarnerit ataqatigiissaarneqaqqullugit taamaalillutik umiarsuit takornariartaatit arlaqartut ataatsikkut sumiiffimmut ataatsimut tikittarunnaarlutik.
- Naalakkersuisut umiarsuarnik takornariartaatinik takornariarneq annertuumik sukateriffigisariaqarpaat. Nunatsinni Qaqortumi, Ilulissani sumiiffinnilu allani tulaffiusuni assersuutigalugu ullormi ataatsimi umiarsuit takornariartaatit ataatsikkut pingasut tikissinnaasarnerat misillerfigisarpaat.
Pissutsit aqunneqarsinnaajunnaalerput. Ukioq manna aggustimi ullualuit ingerlaneranni Qaqortoq umiarsuarnik takornariartaatinik takornariartunit 15.500-init tikeraarneqassaaq, oqaluttuarpoq.
- Tikilluaqqusisussavut ataatsikkut taama amerlatigisunik tikeraartoqarnissamut piareersimanngilluinnarput. Naalakkersuisut sukkanerpaamik maleruagassiortariaqarput, taamaalilluni illoqarfinni, nunaqarfinni allanilu takornariarfiusartuni ataatsikkut taamaallaat umiarsuaq takornariartaat ataaseq tikissinnaalluni, Stine Egede oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
