Borgmesteri: Mittarfiup 2.200 meteriunissaa isiginiarparput
Avannaata Kommuniata borgmesteriata, Palle Jerimiassenip (S) Amerikamiut Ilulissani sakkutuuliiniarnerannik tusatsiakkat eqqissisimasumik tiguai. – Allamik tusagaqarnissatta tungaanut mittarfiliortiternissamik pilersaarut ullumikkut ilisimasarput taamaallaat isiginiarniarparput, oqarpoq
Amerikamiut Kalaallit Nunaanni illersornissaqarnikkut aningaasaliinissamik siunniussaqarnerminnik nalunaaruteqarmatali Amerikamiut sunik tigussaasunik pilersaaruteqarnerat pillugu paasissutissanik pissarsinissaq ajornarsimavoq, Sermitsiaq allappoq.
Danmarkip suleqataaniarnera Amerikamiullu illersornissaqarnikkut aningaasaliiniarnerat mittarfiliortiternissamik pilersaarutinut Inatsisartunit Naalakkersuisunillu suliarineqartunut qanoq kinguneqassanersut Danmarkimi naalakkersuisunit, Amerikami illersornissamut ministereqarfimmit nunatsinnilu Naalakkersuisunit innuttaasunut oqaluttarineqarsimanngilaq.
Avannaata Kommuniata borgmesteriata, Palle Jerimiassenip, saqqummiunneqartut assigiinngitsut eqqissisimasumik tiguai:
− Aap, Ilulissani mittarfissap inuinnarnut sakkutooqarnikkullu mittarfinngorsinnaanerannik tusatsiakkat maluginiarsimavavut, kisianni suli ilisimatinneqarsimannglagut taamaattumillu periarfissap tamatuma isiginiarnissaanut tunngavissaqarnata. Taamaattumik mittarfiliortiternissamik pilersaarut Inatsisartunit Naalakkersuinillu suliarineqartoq, Danmarkimi naalakkersuisut peqataaniarnerat, kisiat isiginiarparput, Palle Jerimiassen Sermitsiamut oqarpoq.
Allaaserineqartoq aviisimi Sermitsiami, aqagu saqqummersussami, tamakkiisumik atuarneqarsinnaavoq. Aviisi uani pisiarineqarsinnaalereerpoq: