Skip to main content

Borgmesteri: Itilliarsuup ikerasaliorfigineqarluni sipineqarnissaa pisariaqavippoq

Kommuni Kujallermi borgmesterip Stine Egedep piumasaraa, Qaqortumiit kujammut isumannaannerusumik imaatigut angalasoqartarnissaa anguniarlugu Itilliarsuup ikerasaliorfigineqarluni sipineqarnissaa.

Kujataani Saarloq silarlukkaagat malissuaqartarpoq. Itilliarsullu ikerasaliorfigineqartuuppat, Qaqortumiit kujammut imaatigut angalanissaq ernumagineqartariaarutissaaq.

Inatsisartut ullumi sisamanngornermi Itilliarsummi ikerasaliornissaq pillugu inatsisissatut siunnersuut siullermeerlugu suliarissavaat. Siuut sinnerlugu Inatsisartuni ilaasortap Anders Olsenip Nanortalimmeersup, inatsisissatut siunnersuut qaqeqqissimavaa. Siunnersuut nutaajuinngilaq, Stine Egedemmi Inatsisartuniikkallarami siunnersuutigisimavaa. Maanna borgmesteritut piumasaqaatigaa ikerasaliortoqarnissaa, imaatigut angalaneq tamanut isumannaannerulersinniarlugu.

- Neriuppunga Inatsisartut ukiormanna suliaq naammassillugu suliarissagaat. Nunatta kujataani, pingaartumik sikorsuit nalaani, ukiukkullu imarlukkajoqisumi, angallannernut isumannaallisaaneq eqqarsaatigalugu iluaqutaalluartussaammat. Aammattaaq peqqinnissaqarfimmi politiinilu angalariataartariaqarnermi piffissamik sipaarfiusussaammat, Stine Egede oqarpoq.

Siusinnerusukkut siunnersuut malinneqartariaqanngitsoq

Stine Egedep nuannaarutigaa, Itilliarsummi ikerasaliornissamik siunnersuut Inatsisartuni oqaluuserineqaqqinniarmat. Erseqqissaassutigaali Orbicon Arctic A/S-ip 50 millioner koruuninik akeqartussatut taggillugu saqqummiussimasaa maleqqissaarneqartariaqanngitsoq.

- Orbicon Arctic A/S-ip suliaqarnermini missingiussaatut silitsigisariaqanngitsoq isumaqarpunga, borgmesteri oqarpoq.

Targanut anginernut politiillu angallataannuut naammakkuni annerpaamik8-10 meterisut silissuseqarnissaa naammaqaaq, aningaasartuutissallu 13-15 millioner koruunit missaaniinnissaat ilimanarnerupput.

- Isumannaallisaaneq eqqarsaatigalugu isaariaanni illuttut aaliangersimasumik sukkassusiliinissamik takussutissianik pilerneqarsinnaavoq. Maanna sikussaarnikuugatta ukioq kaajallallugu atorsinnaasuussaaq, Stine Egede nassuiaavoq.

Ikerasaqarnikkut sivikinnerusumik imaatigut angalasoqartassasoq

Borgmesteri tamatuma saniatigut isumaqarpoq, Itilliarsuk sipineqarluni ikerasaliorfigineqarpat qaartiterinermi ujaqqat piiarneqartut kujataani atorluarneqarsinnaasut.

- Ujaqqat qaartiterinermi piiarneqartut Kummuni Kujallermi atorluarneqarlutik sissiugaliassatut atorneqarsinnaapput, sissiukkammi iluarsagassat tallisariaqartullu arlaqarput, Stine Egede oqarpoq.

Inatsisartut inatsisissatut siunnersuut sisamanngornermi siullermeerlutik suliarissavaat, siunnersuut ullormi oqaluuserisassani kingullersaavoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER