Borgmesteri: Imminut toquttoqarsimanera persuttasoqarsimaneralu tusarlugit annernarpoq

Tasiilami nunaqarfiinilu imigassamik aalakoornartortalimmik tunisaqarsinnaaneq tallimanngormat ualikkut inerteqqutigineqalerpoq. Kommuneqarfik Sermersuup peqqinnissaqarfimmit saaffiginnittoqarneratigut inerteqquteqalernissaq Naalakkersuisunut qinnutigisimavaa.

Kommuni naapertorlugu, illoqarfimmi piffissap sivikitsup ingerlanerani angerlarsimaffinni 15-ini eqqissiviilliortoqarsimanerata, inuit marluk imminnut toqussimanerisa, inuit sisamat imminnut toqunniarlutik aarlerisaarisimanerisa arfinileriarlunilu persuttaasoqarsimanerata malitsigisaanik saaffiginnittoqarsimavoq.

Borgmesterip pisoq alianarluinnartuusoq oqaatigaa:

- Pisoq assut alianarpoq, inerteqquteqarnerlu utaqqiisaasumik tamatuminnga unitsitsisinnaasoq soorunami tapersersorparput. Inuit amerlasuut ullualunnguani kingullerni inuttut nalaataat tusarlugit assut annernarpoq, taamaattumik aalajangiineq eqqortuusoq qularutiginngilara, Kommuneqarfik Sermersuumi borgmesteri Charlotte Ludvigsen (IA) kommunip nittartagaatigut oqarpoq.

Imigassartaqanngitsumik sammisassaqartitsinerit arlallit

Aalakoornartortalinnik tuniseqqusaannginneq sapaatip akunnerini marlunni atuutissaaq, borgmesterillu illoqarfimmi immikkut ikiuisoqarnissaa neriorsuutigaa:

- Ingerlatsivipput sakkortuumik nalaataqarnermi ikiuigasuartarnermut neqeroorusioqqullugu qinnuigaara, inuillu eqqugaasut ataatsimoortinniarlugit pisinnaasarput tamaat atorlugu sulissuteqarnissarput pingaaruteqartoq isumaqarpunga.

- Taamatuttaaq ulluni 14-ini tulliuttuni innuttaasut ataatsimoorfigisinnaasaannik amerlasuunik imigassartaqanngitsunik sammisassaqartitsisoqarnissaa qinnutigaara. Ilaatigut tusarnaartitsisoqarsinnaavoq sumiissusersiorluniluunniit arpatsitsisoqarluni, Charlotte Ludvigsen oqarpoq.