Borgmesteri: Ilulissat ineriartornissaat Unescop unitsippaa
Tamatumunnga atatillugu Avannaata Kommunia innuttaasunut ataatsimiisitsinissamut aggersaavoq, periarfissat pillugit killilersuutillu oqallisiginissaannut, tamakku Unesco-qarfimmut killeqarfigititaannullu attuumassuteqarlutik.
Ilulissat Kangiat eqqissisimatitaavoq, aammattaarlu Unesco-mi nunarsuarmi kingornussassarititat allattorsimaffiannut ilanngunneqarsimalluni.
Nunarsuarmi kingornussassarititat allattorsimaffiannut allattuinermi nunarsuarmi kulturinik pinngortitanillu kingornussassat aserorneqarnissamut illersorneqarnissaat, taamaalillunilu kinguaariinnit tulliuttunit aamma nunarsuarmi nunat kulturikkullu eqqaassutissat asseqanngitsut nuannaarutigineqarsinnaanissaat siunertarineqarpoq.
Eqqissisimatitami ineriartornissaq
Tamannali Avannaata Kommunianut unamminartoqarpoq. Borgmesteri Palle Jerimiassenip kajumissaarutigaa illoqarfiup kujammut ineriartortinnssaa pillugu oqalinneq ammaattariaqartoq isumaqarpoq.
- Isumaqarpunga sulissutigisariaqartoq piviusunngortillugulu illoqarfiup kujammut ineriartortissinnaanera. Soorunami UNESCO-qarfik aamma killeqarfiliussaq killiliissapput, isumaqarpungali oqaloqatigiinnissamut piareersimasariaqartugut ammasumik eqqartuinissamut, oqartussaasullu (namminersorlutik oqartussat) paasisariaqarpaat Ilulissani innuttaasut kujammut sanaartorusuttut, Avannaata Kommuniani borgmesteri Palle Jerimiassen kommunip nittartagaanut oqarpoq.
Innuttaasut piumasaat
Namminersorlutik oqartussatmaanna eqqissisimatitsinissamut kaajallaasitaq Ilulissat Kangerluanut atuuttoq Ilulissallu Kangerluanut aqutsinissamut pilersaarut nutartilerpaat, taakku marluk ukioq manna qaangiutissapput.
- Ilulissat Kangerluanut eqqissisimatitsinissamik nalunaarutip aamma Ilulissat Kangerluata aqutsiviunissaanut pilersaarutip nutarternissaannut peqataasariaqarpugut, isumaqaratta manna killilersuutit allanngortitattariaqartut innuttaasut kissaataannut iluaqutaasumik, Palle Jerimiassen oqarpoq.