Borgmesteri: Danmarkimit aningaasaliissutit iluaqutigilluarpavut
Kommuneqarfik Sermersuumi meeqqanut ilaqutariinnullu pisortap isornartorsiuinerata kingorna Avannaata Kommunia suleqatigiinnermut nersualaarilluni tutsiuppoq. Kommuni Danmarkimit aningaasaliissuteqartoqarneratigut immikkut suliniuteqarnerup angusaqarfiulluarsimaneranik misigisaqarsimavoq.
Avannaata Kommuniani Folketingip nunatsinni meeqqanut inuusuttunullu atugarliortunut 80 millioner koruuninik aningaasaliissuteqarnerata kingorna meeqqanut inuusuttunullu suliaqarfiup iluani angusanik takusaqarsinnaalereersimapput, inunnik isumaginninnermi siunnersortit Danmarkiminngaanneersut arlallit kommuni suleqatigalugu kalaallit qallunaallu suliaqarfiit akimorlugit suliaqarsimanerannut atatillugu.
Taama Avannaata Kommuniani borgmesteri, Palle Jerimiassen, nalunaaruteqarpoq, suliniuteqarneq Kommuneqarfik Sermersuumi meeqqanut ilaqutariinnullu pisortamit, Martha Lund Olsenimit, sapaatip-akunnerani kingullermi isornartorsiorneqareersorlu.
Isornartorsiuinerup ilaa isumaqatigigaa
Pitsaasorpassuarnik angusaqartoqarsimagaluartoq Palle Jerimiassenip isornartorsiuinerup ilangaatsiarsua aamma ilisarisinnaanerarpaa.
- Martha Lund Olsen ilaatigut isumaqatigalugu Isumaginninnermut Aqutsisoqarfiup annertusarneqarneranut aningaasaliissutinik atuineq apeqquserusussinnaavara, aningaasammi sulisutta piginnaanngorsaarnissaannut atorneqarnissaat orniginarnerugaluarmat.
Taamaakkaluartoq Palle Jerimiassen isumaqarpoq, suliniuteqarneq kommunimi meeqqanut inuusuttunullu pissutsinik pitsanngoriartitseqataalluareersimasoq.
- Isumaginninnermut siunnersortit danskiusut Avannaata Kommunianit aallareernerisa kingorna ukioq suliluunniit qiteqqutinngilaq, suleqatigisimaneranniillu ersarissunik maanna angusaqarsimalereernerput naammagisimaarparput, Palle Jerimiassen oqarpoq.
Suliniuterpassuit nutaat
Oqaatigaa Atuartut atugarliortut suliniuteqarfigineqarnerat maanna atuartitsinermi malinnaallualernerannik kinguneqareersoq, illoqarfinni tamani nunaqarfinnilu pisariaqartitsinerpaani ilaqutariit ikinngitsut ilaqutariit katsorsarneqarnissaannut innersuunneqarsimalereersut.
Meeqqat inuusuttullu 18-inik ukioqalernissaasa tungaannut ornittagassaat Ilulissani misiligutaasumik suliniutitut aallartinneqarsimalereerpoq, taamalu pingaartumik akissarsiffiup nalaani toqqissisimanartumik avatangiiseqarnissaannut periarfissiisoqarluni.
Ilaqutariinnut katsorsaasut ilaqutariit illuiniittut piginnaanngorsarlugillu ilinniartinneqarsimalereerput, ilaqutariit meerartallit pitsaanerusumik sullinneqarnissaat qulakkeerneqarpoq.
Suliassanik isumaginninneq ajornannginnerusoq
Kommuni pineqartumi sulisunut pikkorissaanernik attuumassutilinnik arlalinnik ingerlatarsimavoq. Attuumassuteqartullu pissutsini meeqqani atugarliornermik maluginiagaqarfigisaminni iliuuseqarnissamut periarfissaqalersimallutik.
Atuarfinnik, meeraaqqerivinnik aammalu meeqqerivinnik suleqateqarnitta killilerneratigut suliffeqarfiit taakku meeqqanik atugarliortunik sullissinerminni nalilersuisinnaanikkut sullissisinnaanikkullu kiffaanngissuseqarnerulersinneqarput, borgmesteri paasissutissiivoq.
- Pingaarnertut oqaatigalugu assigiinngitsunik suliallit suleqatigiinnerisigut suliassanik isumaginnittarneq pisariillisarneqarlunilu sukkanerulersinneqarpoq. Suliassanik isumaginnittartut sullissisussatut suliassallu aallaavigalugit akimmisaarfiunnginnerusumik sulisinnaalernermikkut suliassanik isumaginnittarnermi pilertornerusumik pitsaanerusumillu inaarsisinnaalerput, Palle Jerimiassen naggasiivoq.