Borgmesteri: Atuarfimmi nerisaqartitsisarneq unitsinnianngilarput
Kommuneqarfik Sermersooq atuarfimmi nerisaqartitsisarnermik unitsitsinianngilaq, Naalakkersuisut aaqqissuussamut tapiissuteqarunnaaraluartut. Borgmesteri Charlotte Ludvigsen Naalakkersuisunut isornartorsiuiutigaluni erseqqissaavoq
- Atuartuutitta nerisaqartinneqarnissaat pingaartilluinnaratsigu nammineerluta akiliuteqarsinnaavugut. Qularinngilluinnarpara meeqqat qaarsilaartut ilikkagaqarniarnissaq ajornannginnerutittaraat atuartuunerminnillu pissarsiaqarnerusartut, aamma meeqqat ilaat atuarfinni nerisaqartinneqartanngikkunik nerisaqartanngitsut paasisariaqarparput, borgmesteri IA-meersoq Charlotte Ludvigsen ilisimatitsivoq.
Nerisaqartitsisarnermut Naalakkersuisut sipaaruteqarniarlutik aalajangersimanerat tupigusuutigivaa.
- Meeqqat atuarfiannik nukittorsaanissaq pimoorussimassappassuk manna pisoq paasiuminaalluinnarpoq. Nunatut anguniagaraarput, siunissami meeqqat tamarmik meeqqat atuarfianni atuariarlutik ingerlaqqillutik ilinniagaqarnissaat. Taamaammat taakku pitsaanerusumik atugaqartinnqarnissaat pisariaqarpoq, Charlotte Ludvigsen oqarpoq.
Kommuneqarfik Sermersooq atuarfimmi nerisaqartitsinissamut ukioq manna 980.000 koruuninik tapiissutisivoq, tapiissutilli aningaasartuutit ilaminiinnanngui matussusertarpaat. Taamaakkaluartoq nalunaaruteqaqqaarani tapiissutinik atorunnaarsitsineq borgmesterimit ernumanartinneqarpoq.
- Atuarfimmi nerisaqartitsinissamut tapiissutaasartut annertugisassaanngillat, taamaammat tapiissutit peerneqarnerisa aningaasaqarnerput ajalusoortinnavianngilaa, isumaqarpungali ukioq taamaalereersoq missingersuutitsinnik iluarsiinissamut periarfissaqartinnata, Naalakkersuisut kommunit aningaasaqarnerannik allannguinerat kusanaatsoq, Charlotte Ludvigsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...