Borgmesteri utoqqatsertoq: Tulleriiaattorpassuarnit siullinngorluni kapitissimasoq
Charlotte Ludvigsenip tulleriiaattorpassuarnit siulliulluni kapitissimanini utoqqatsissutigaa.
Kommuneqarfik Sermersuumi borgmesteri Charlotte Ludvigsen (IA) nassuerpoq, juulip 22-ani Nuummi akiuussutissalersuisunut ornigukkami immikkut ittumik sullinneqarsimalluni.
Ulloq taanna silarluppoq, inuppassuillu Nuup qeqqaniittumi atuarfimmi USK-imi akiuussutissalertinniarlutik nalunaaquttap akunnerpassuini utaqqisariaqarsimallutik. Ullormilu tassani innuttaasut arlaqartut akiuussutissat nungummata asuli utaqilutsinneqarsimapput.
Charlotte Ludvigsenili akiuussutissalerneqarsimavoq tulleriiaattullu akornanniittariaqarsimanani.
Borgmesteri atorfilittat marluk peqatigalugit akiuussutissalersuiffimmut takkussimavoq. Borgmesteri naapertorlugu atorfilittat taakku marluk immikkut ulorianartorsiortuupput, taamalu tulleriaattunit sallinngortinneqarnissamut pisinnaatinneqarlutik.
- Siulliunneqarnissaq siunertarineqarsimanngitsoq
Atorfilittat taakku marluk borgmesterilu tulleriaattunit siullinngortinneqarsimapput, tamannalu borgmestermimit ajuusaarutigineqarpoq:
- Soorunami nunami innuttaasunit allanit pitsaanerusumik pineqarnissara siunertarineqarsimanngilaq, pisimasorlu tamaat eqqarsaatigalugu utoqqatserusuppunga. Siullinngortussaasimanngikkaluarpunga, iliuuserisimasaralu utoqqatsissutigaara, Charlotte Ludvigsen Sermitsiaq.AG-mut allakkatigut akissuteqarluni oqarpoq.
Charlotte Ludvigsenip ilanngullugu oqaatigaa, ullormi pineqartumi naammattunik akiuussutissaqanngissinnaanera eqqarsaatigisimanagu.
Borgmesteri Fcebookikkut tamanut utoqqatsersimavoq.