Borgmesteri sulisullu arlallit tunillatsittoqarsimanera pissutigalugu angerlartinneqarsimapput
Avannaata Kommuniani sulisut arlallit Munch Gruppenimi sulisunik qanimut attaveqarsimasut angerlartinneqarput - taakkununnga ilaallutik borgmesteri kommunimilu pisortaq
Nunatsinni Nakorsaanerup Henrik L. Hansenip pingasunngormat oqaluttuaraa, inuk ataaseq Ilulissani mittarfiliornermik suliaqartuneersoq coronavirusimik tunillatsissimasoq.
Tassunga atatillugu Avannaata Kommunianit ilisimatitsissutigineqarpoq, Avannaata Kommuniani sulisut qulit missaanniittut Munch Gruppenimi sulisunik qanimut attaveqarsimasut angerlartinneqarsimasut.
Pisortaaneq Nick Nielsen borgmesterilu Palle Jerimiassen pingasunngormat Munch Gruppenimi sulisunik ataatsimeeqateqaqqammersut nalunaarutigineqarsimavoq tunillatsittoqarsimasoq, taamaammallu angerlartinneqartunut ilaatinneqarlutik.
- Sulisut Munch Gruppenimeersunik qanimut attaveqarsimasut avannani nunap immikkoortuani nakorsatut qullersaasup innersuussineratut angerlartinneqarallarput, kommuni allappoq.
Angerlartinneqartut peqqinnissaqarfimmit attavigineqassasut
- Maleruaqquneqartut nalinginnaasut malillugut angerlarsimaffitsinniit suligallartussanngorpugut. Sulisut angerlartinneqartut napparsimmaveqarfimmiit arlaatigut iliorfigineqarnissartik siunnersorneqarnissartillu utaqqillugu annertunerusumik paasitinneqarnissartik utaqqivaat, Palle Jerimiassen Avannaata Kommuniani borgmesteri oqarpoq .
Palle Jerimiassenip pingasunngormat Sermitsiaq.AG-mut oqaluttuaraa, Ilulissani utoqqaat illuannut pulaartoqaqqusaajunnaarnissaa aalajangiunneqarsimasoq
Angerlarsimaffimmi ikiorteqarneq killilerneqartoq
Kommunip tusagassiorfinnut nalunaaruteqarnermi itisilerlugu oqaatigaa, tuniluuttoqannginnissaa anguniarlugu angerlarsimaffimmi ikiortit suliarisartagaanni pisariaqarnerpaaginnaat maannamiit suliarineqalissasut.
- Coronap Ilulissanut tikiunnerani pingaartumik utoqqartagut navianartorsiorsinnaasutullu inissisimasut paarilluartariaqarpagut. Ilulissani innuttaasut kaammattorusuppakka tuniluuttoqannginnissaa anguniarlugu nunatsinni nakorsaanerup inassutaanik nalinginnaasunik malinneqqullugit. Nunatsinni innuttaasut siusinnerusukkut takutereerpaat tuniluuttoqarsinnaaneranik siaruatsaaliuineq iluaqutaasoq, taamatullu iliuuseqarneq maanna nangittussanngorparput, borgmesteri Palle Jerimiassen oqarpoq .