Skip to main content

Borgmesteri Stine Egede: Kalaallit Nunaat tunniusimasumik ikiuukkumatuumik ilungersullaqqissumillu annaasaqarpoq

Tarnip pissusaanik ilisimasalik, GU-mi rektoriusimasoq, politikeriusimasoq, annertuumillu inuiaqatigiinni sullissisimasoq Else Poulsen napparsimareerluni 2023-mi novembarip 25-anni 67-inik ukioqarluni toquvoq, Kommune Kujallermi borgmesteri Stine Egede (IA) eqqaaniaalluni taamak allappoq.

Else Poulsen kalaallini siullerpaalluni marluinnik oqaaseqarluni 1986-imi cand.psych.-imik ilinniarsimasuuvoq, nunatsinnilu sunniuteqarluartumik suliarpassuaqartoq.

Kujataani MISI-mi tarnip pissusaanik ilisimasallit pisortaattut atorfeqarsimavoq, Kujataani Ilinniarnertuunngorniarfimmi rektoriusimavoq, Nunalu Tamakkerlugu Ilitsersuisarfimmi aqutsisuusimalluni.

Ilinniarfinni ingerlaqqiffiusuni ilinniartitsiartortartutut censoriusartutullu, kiisalu ilinniartunut siunnersuisarlunilu aqqutissiuussisartuulluni sulisarsimavoq.

Elsep kingullermik suliffigisaani ilinniarnertuunngorniarfimmi immikkut pisariaqartitsisut sullitarai, tassa Qaqortumi GUX-S-imi ilinniartut immikkut pisariaqartitsisut nappaateqartulluunniit sullitaralugit.

Else Poulsen sulinermi saniatigut Imigassaq Ikiaroornartorlu pillugit Siunnersuisoqatigiit aallartisarneranut peqataasimavoq, allattoqarfianilu aqutsisuusimalluni.

Meeqqat kinguaassiutitigut atornerlunneqarsimasut katsorsarneqarnissaat sulissutigisaraa

Illoqarfinni allani atorfissaqartinneqarsimatilluni inoqatiminut tunniusimalluarluni ikiuukkumatuuvoq, ilaatigut meeqqat kinguaassiutitigut atornerlugaasimasut katsorsarneqartarnissaannik ilungersuuteqartuusimalluni.

Nuna tamakkerlugu KNR radiukkut tarnip pissusaanik immikkut ilisimasalittut Elsep nammineq ilisimasaminik inuiaqatigiit sakkusatsinnik nassuiaassilluni annertuumik tunioraasarsimavoq.

- Else pissutsini iluanngittoqartillugu suna tamaat tikillugu ajugaaniallaqqissuuvoq, partiigisaminullu IA-mut tunniusimalluartuulluni kommunalbestyrelsimi ilaasortaasimalluni. Annaasaq qanigisaasunut nunatsinnullu annertoqaaq. Elsep qimatai uia, ernera, ernutai ilaqutaalu tamaasa misiginneqatigaakka.

Elsep eqqaaneqarnera ataqqinartuuli, borgmesteri Stine Egede eqqaaniummini naggasiivoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER