Borgmesteri politiit naliliinerannut isumaqataanngilluinnartoq

Kalaallit Nunaanni Politiit isumaqarput, kommunefogedinik pingasunik sulisoqarnera naammattoq, taamaammallu Kangaatsiaq nammineq politeeqarfeqartariaqanngitsoq politiinik sulisulinnik. Tamanna politiit Danmarkimi inatsisinik atuutsitsinermut ministerimut ilisimatitsissutigisimavaat.

Inatsisinik atuutsitsinermut ministerip akissuteqaatisiniarni folketingimi ilaasortamut Aaja Chemitz Larsenimut, Kalaallit Nunaanni illoqarfiit allat assigalugit Kangaatsiap politeeqarfeqartariaqarneranik kissaateqartumut ingerlateqqissimavaa.

Politiilli illoqarfimmi pinerluttoqartarneranik politeeqarnissaanillu pisariaqartitsisoqarneranik naliliisimanerat Kommuni Qeqertalimmi bormesterip Aen Hansenip (IA) tupigusuutigaaa.

Borgmesterip isumaqatiginngilaa, kommunefogedit politiitulli Kangaatsiami innuttaasunik naammaginartumik sullissisinnaanerat.

Isumaginninnikkut suliaqartarnermi pingaaruteqarluinnartut

- Inatsisinik atuutsitsinermut ministerip Aaja C. Larsenip apeqqutaanut akissutaa ilisarisinnaanngilarput, Ane Hansen Sermitsiaq.AG-mut allakkatigut oqaaseqaateqarluni allappoq.

Borgmesterip oqaatigaa, Kangaatsiami Kangaatsiallu nunaqarfiini isumaginninnikkut annertuumik suliaqartoqartartoq, tassani poligiit aamma pingaarutilimmik suliaqartarlutik.

Ane Hansenip ilisimatitsissutigaa, kommunip Isumaginninnermi Aqutsisoqarfik suleqatigalugu meeqqat inuusuttullu pillugit suliat naatsorsorsimagai, tassunga atatillugu aqutsisoqarfik kommunefogedit suliassaminnik isumaginnittarnerannut piumasaqaateqarsimalluni:

- Nunaqarfimmi kommunefogedeqartoqannginnera pissutigalugu, isumaginninnermi sulisut sulisarnerat isumannaatsuunngilaq, Isumaginninnermi Aqutsisoqarfik ukioq manna juulip aappaani Kommuni Qeqertatlimmut allappoq.

Kommuni naapertorlugu, isumaginninnermi sulisut angerlarsimaffinnut pulaarnissamut politiinit ikiorserneqarnissamik qinnuteqartarnerat politiinit itigartinneqartarsimavoq. Aaamma persuttaasoqarsimaneranik nalunaaruteqarsimanerit pineqaraluaraangataluunniit.

- Naliliisoqarneratigut ikiuuttartut

Borgmestgerilli taamatut oqaaseqarnera politimesterip Bjørn Tegner Bayip ilisiarisinnaannginerarpaa:

- Tassunga atatillugu eqqaamaneqartariaqarpoq, pisuni ataasiakkaani politiit ikiuuttariaqarnerannik oqartussat tigussaasumik naliliinerisigut politiit ikiuuttarmata. Isumaginninnermi sulisut ulorianartorsiortinneqanngitsut naliliisoqarsimappat, taava politiit peqataanissartik suliassarinngilaat.

- Meeqqat persuttarneqarsimasut pillugit ilisimatitsissuteqartoqarpat, soorunami naatsorsuutigaara kommunip tamanna uagutsinnut nalunaarutigissagaa, tamatumalu kingorna pissutsit soorunami misissuiffigissavavut, Bjørn Tegner Bay oqarpoq.

Kommuni illoqarfimmi pinerluuteqartoqarneranik ernummateqartoq

Borgmesterip ilanngullugu oqaatigaa, politiit pinerluttoqarsimaneranik ukiumoortumik nalunaarusiarisartagaanni Kangaatsiap ilanngunneqarneq ajornera ajuusaarnartoq, innuttaasummi amerlassusaat eqqarsaatigalugu illoqarfimmi qanoq pinerluuteqartoqarsimatiginera kommunimit nalileruminaattarmat.

Kommunimiilli isumaqarput, kommunimi illoqarfinnut allanut sanilliullugu Kangaatsiami pinerluuteqartoqarnerusartoq:

- Tamanna Aasiaat illoqarfianut nunaqarfiinullu sanilliullugu Kangaatsiami nunaqarfiinilu meeqqat inuusuttullu pillugit suliaqartoqarnerusarneratigut takuneqarsinnaavoq, tassa Aasiaat nunaqarfiilu pingasoriaammik innuttaqarnerusoq pinerluffiunerusanngimmat, borgmesteri Ane Hansen allappoq.

Sermitsiaq.AG-p isornartorsiut Kalaallit Nunaanni Politiinut saqqummiussimavaa, politiillu Kangaatsiami nalunaarutigineqartartut tigulaariffigalugit allattorsimavaat:

Politimesterip nassuiaatigaa, kisitsisitigut nalunaarsuisoqartannginneranut pissutaasoq, Politiit IT-kkut atortorissaarutaat atorlugit politeeqarfiit sumiinneri tunngavigalugit kitsitsitigut nalunaarusiortoqartartoq.

Naliliisimanertik attatiinnaraat

- Nunap immikkoortuini allani kisitsisitigut nalunaarusiortarneq nammineerluni suliarineqartartoq piffissamik atuiffiusaqaq. Suleqatikka uangalumi pisinnaatilluta soorunam kommunit nalunaarusiorluta ikiorsinnaavagut, politimesteri Kangaatsiap politeeqarfeqartariaqannginnera pillugu isummaminik aalajangiussisimasoq oqarpoq, naakka politeeqarfeqarusunneq paasisinnaaneraraluarlugu:

- Isumanga malillugu politeeqarfiup qaninnerpaamiinnissaanik innuttaasut kissaateqarnerat pissusissamisuuginnarpoq. Taamatulli oqareerlunga oqaatigissavara, politiit isumalluutaat - sumiiffinni allanisuulli - killeqarput. Uangua qulakkiissallugu suliassarivara, Kalaallit Nunaanni politiinut aningaasatigut atugassarititaasut iluini politiit pitsaasumik sunniuteqarluartumillu suliaqartarnissaat, politimesteri oqarpoq, nangillunilu:

- Kangaatsiamik politiitut ilinniagalinnik sulisoqarnissamik pisariaqartitsineq isumanga malillugu, Kangaatsiami politeeqarfimmi pilersitsillunilu ingerlatsinermi aningaasartuutigineqartussat iluaqutaasinnaasunut naapertuutinngilluinnarput.