Borgmesteri Narsami aallaasersortoqarnera pillugu: Eqqaamasanik nuanninngitsunik qaffakaatitsivoq
Narsami pinerluttup qulimiguulinnut mittarfimmi inunnik marlunnik pingasunngornermi aallaanninnerata kingorna Kommune Kujalleq ajutoornermi upalungaarsimanermik aallartitsivoq. Kikkut tamarmik pisoq pillugu, imaluunniit qangali pisunit kingunerlutitsinerit pillugit ikiorserneqarsinnaapput, borgmesteri Stine Egede oqarpoq.
Pingasunngornermi nalunaaqutaq 17.00 missaani Narsaq sakkortuumik pisumik eqqorneqarpoq, tassani pinerluttoq qulimiguullip Narsarsuarmit tikeqqammisup tungaanut eqqarpoq. Inuit marluk eqqorneqarput, pingasullu allat qulimiguullip igalaavata aserorneranit atortullu eqqorneqarnerannit ajoquserput.
Inunnik inuunerminnik navianartorsiortoqanngilaq, kommunillu innuttaasut sapinngisaminik ikiorniarsarai, borgmesteri Stine Egede (IA), Sermitsiaq.AG-mut oqaluttuarpoq.
- Pinerluttoq tigusarineqarpoq, politiillu suliaminnik ingerlatsipput. Ilaasunut, qulimiguulimmi aquttunut napparsimmavimmilu sulisunut misigisaq ajorluinnarpoq. Meeqqat arlallit innuttaasullu allat aallaasersornermut takunnipput. Pisoq ilungersunarluinnarpoq, Stine Egede oqarpoq.
Ullumikkut ersisoqassanngilaq
Qangali pisimasunit eqqaamasat Narsami alianartut saqqummertikkaat, taassuma oqaatigaa.
- Inuit soorunami sunnertisimapput, qangalilu pisimasoq saqqummeqqippoq. Taanna suli eqqaamaneqarpoq, uangalu nammineq uanni saqqummeqqittoq malugisinnaavara.
Illoqarfimmi innuttaasunut arlalinnut pisoq sakkortooq 1990-imi ukiumi nutaami ullaakkut pisoq eqqaasitseqqippoq, tassani inuit arfineq-marluk angummit 18-inik ukiulimmit toqunneqarput.
- Ippassaq inuit aallaammik eqqorneqarnerat sakkortullunilu alianarpoq, kisianni qujanartumik tamarmik aniguipput inuunerminnillu navianartorsiunngillat. Pinerluttoq tigusarineqarpoq, ullumikkullu ulorianartoqanngilaq, borgmesteri Stine Egede oqarpoq.
Pingasunngornermi unnukkut ajutoortoqarnerani ataatsimiinneq
Innuttaasut arlallit kommunip upalungaarsimasuinut pingasunngornermi unnukkut attaveqarput. Borgmesteri Stine Egede nalaatsornerinnakkut Narsamiippoq, tassani inuussutissarsiorneq pillugu isumasioqatigiinnermut peqataavoq.
- Qanoq pisoqarsimanera paasigatsigu kommunimi isumaginninnermut pisortaq attaveqarfigaarput, taassuma ajutoortoqartillugu upalungaarsimaneq aallartippaa, innuttaasut nalunaaqutaq 19.30 katersortarfimmut aggersarneqarlutik.
Inuit 50-it missaanniittut ataatsimiinnermut takkupput, tassani qulimiguulimmut eqqarfigineqartumut ilaasut, Air Greenlandimi sulisut aallaasersortoqarneranillu takunnittut ilaallutik.
- Takkuttut misigisartik pillugu tamarmik immikkut oqaluttuarput, taamaalillutillu innuttaasut allat pisoq pillugu paasitinneqarput. Aamma pappiaqqanik agguaavugut, ilisimannittuunermi imaluunniit allatigut ikiorneqarnissamik pisariaqartitsinermi qanoq iliortoqarsinnaanersoq nassuiaalluta.
Kommuni ikiuinissamut piareersimavoq
Innuttaasut ippassaq misigisaminnik ikiorserneqarnissamik pisariaqartitsisut, imaluunniit 1990-imi suliamit kingunerlutsitsisimasut kommunimut attaveqarnissaminnut tikilluaqqusaasut, borgmesterip oqaatigaa.
- Naak ukiorpassuit qaangiutereeraluartut amerlasuut suli sunnerneqarput. Aamma meeqqanut pinerluffiusup qanittuani pinnguarsimasunut angajoqqaat imaluunniit sumiiffimmi takunnittut oqaluuserinninnissaminnik pisariaqartitsisinnaapput, tamanna pillugu aamma ikiuinissamut piareersimavugut, borgmesteri naggasiivoq.