Borgmesteri nakkutilliisut aalajangiinerannut akerliulluinnartoq

Kommuneqarfik Sermersooq sapaatip akunnerata ataatsimip matuma siorna Kommunit Nakkutilliisoqarfianit peqqussummik tigusaqarpoq. Kommunip Namminersorlutik Oqaartussat kommunimik nakkutilliineranut atatillugu atortussat amigaatigineqartut ingerlaannartumik tunniutissagai piumasarineqarsimavoq.

Nakkutilliisut paasiniartussaavaat, kommuni sanatitsisunit namminersortunit inissanik attartoriarluni kommunip inissiaatileqatigiiffiutaa Iserit aqqutigalugu innuttaasunut attartortitseqqinnermini inatsimmik unioqqutitsisimanersoq.

Naalakkersuisut Siulittaasuata Naalakkersuisoqarfiani Nunamut namminermut Immikkoortortaqarfimmi pisortaq Klaus Georg Hansen naapertorlugu, inissanut tunngatillugu aaqqissuussamik politikkikkut suliaqarsimanermut akuersissuteqarsimanermullu uppernarsaatit kommunimit ilaatigut tunniunneqarsimanngillat.

Kommunilli isumaa naapertorlugu peqqussummut atatillugu ajornartorsiutaasoq tassaavoq, kommunkp suliami uppernarsaatigit pigisani tunniutereersimagai. Taamatut oqarpoq borgmesteri Charlotte Ludvidsen (IA) Sermitsiaq.AG-mut allakkatigut oqaaseqaateqarnermini:

- Tamanna tupigilluinnarpara. Nakkutilliisoqarfimmummi imaqarniliat ilanngussallu 2016-imiit 2019-imut atuuttut tamarmik nassiunneqareernikuupput.

Sanaartornermi uppernarsaatit amigaataasut

- Nakkutilliisut ullormut oqaluuserisassatsinnut atortorissaarupput aamma iserfigisinnaavaat, taamaalillutillu Kommuneqarfik Sermersuumi politikkikkut uppernarsaatit tamaasa uagutsitulli takusinnaallugit. Taamaammat qulakkeerlugu oqaatigisinnaavara, nakkutilliisut suliami matumani politikkikkut aalajangiissuteqarnerni uppernarsaatit tamaasa pigereeraat, Charlotte Ludvigsen oqarpoq.

Klaus Georg Hansen naapertorlugu, inissianut kommunip sanatitsisunit namminersortunit attartorsimasaanut tunngatillugit sanaartornermi suliat ilaannut qitiusumik uppernarsaataasut kommunip suli tunniussimanngilai.

Borgmesterip nassuerutigaam uppernarsaatit ilaat amigaataasut, borgmesterilli oqaatigaa, taakku suliamut attuumassuteqanngitsut:

- Klaus Georg Hansenip suna pineraa paasisinnaanngilluinnarpara. Qinnutigisimasai 80.000-ingajalluinnarnik quppernillit nassiutereerpavut, taamaallaat uppernarsaatit arfinillit piginngisamut nassiussimanngilagut, Charlottq Ludvigsen oqarpoq.

Nakkutilliisut ataatsimeeqqissinnaasut

Sermitsiaq.AG-mit Kommuneqarfik Sermersuup nakkutilliisunut akissutai takuneqarsimapput. Uppernarsaatit takussutissartaanni atuarneqarsinnaavoq, uppernarsaatit tallimat amigaataasut - ataaseq nassaarineqarsimavoq tunniunneqarsimallunilu:

• Sanaartugasanut marlunnut pisortanut taarsigassarsiniarnermut qinnuteqaat
• Sanaartornermi ataatsimi taarsigassarsianik tunniusseqqusineq
• Sanaartornernut malunnut naatsorsuutit

Uppernarsaatit amigaataasut pillugit Kommuneqarfik Sermersooq nassuiaateqarpoq:

- Uppernarsaatit sisamat sanaartukkanut Kommuneqarfik Sermersuumit pisiarineqarsimasunut taamaammallu ullumikkut attartorneqanngitsunut attuumassuteqarput.

Kommunimit taamaammat nalilerneqarpoq, uppernarsaatit suliamut attuumassuteqanngitsut, suliamimi inissiat attartorneqarnerat pineqarmat.

- Inissiamut uppernarsaat nassaarisinnaanngisatuarput tassaavoq, inimut attartukkatsinnut tunngatillugu sanaartorsimanermut naatsorsuutit. Tamatumunnga pissutaavoq, inissiaq atorneqalermat sanaartornermi naatsorsuutit kommunimut tunniunneqarnissaat piumasaqaataasimanngimmat, Kommuneqarfik Sermersooq ilisimatitsivoq.

Klaus Georg Hansenip ilisimatitsissutigisimavaa, uppernarsaatit nakkutilliisut amigaatigisaat Kommuneqarfik Sermersuumit piaarnerpaamik tunniunneqanngippata, Nakkutilliisut decembarip qaammataani ataatsimeeqqittariaqassasut, tassani susoqassanersoq nakkutilliisut isummissallutik.