Borgmesteri naammatsittoq: Ilulissani takorniariartitsisarneq ingerlalluarpallaaqaaq
Avannaata Kommuniani borgmesterip Palle Jerimiassenip umiarsuarnit takornariartaatiniit takornarissat Ilulissanukartartut amerlassusaat killilerusuppai - tamatumunngalu arlalinnik pissuteqarpoq.
Kalaallit Nunaanni takornariaqarluartoqartarnissaa siunniussaavoq - umiarsuarnillu takornariartaatinit Ilulissanut 2022-mi tikittoqarluartarsimalluni. Umiarsuit takornariartaatit illoqarfimmut illoqarfiullu kangianut tikittut coronap atuutilinnginneranut sanilliullugu amerlanerujussuusimallutik. Aasaq manna umiarsuit takornariartaatit 60-inik amerlanerusut tikissimapput. Tamannalu ajunngilaq. Kisianni takornariat amerlavallaarsinnaappat?
Aap amerlavallaarsinnaapput, Avannaata Kommuniani borgmesteri Palle Jerimiassen taamatut isumaqarpoq.
Tattoqisaattut
Kommunimit tusagassiorfitsigut nalunaaruteqarnermi ilisimatitsissutigineqarpoq, ilaatigut tikittut ima amerlatigisartut, allaat illoqarfik inunnut taamak amerlatigisunut sullissisinnaasarani.
- Takornarissat amerlasoorsuakkaat kissaatiginngilavut, takornarissat misigisassaat aserorneqartarput, najuk-kamilu innuttaasut artukkerneqartarlutik, Palle Jerimiassen pinngortitap immikkuullarissup alutornartullu misigisaqarfiginissaanik anguniagaqartoqartartoq isumaqartoq oqarpoq:
- Tattoqisaakkaannilu tamanna misigineqanngitsoortussaalluni.
Palle Jerimiassenip tulattussanut pilersaarutit pitsaanerusumik ataqatigiissaarneqartarnissaat ujartorpaa, tassani najukkami innuttaasut pisinnaasatigut killilersuutaasa qajassuunneqarnissaat kissaatigalugu
Killilimmik isaatitsissutaasartut
Borgmesterimit aamma kissaatigineqarpoq, takornarissat amerlassusaat killilerneqassasut.
- Umiarsuarnit takornariartaatiniit takornarissat ullormut 1000-it taamaallaat takorniariartissinnaavavut.
Ullumikkut illoqarfiup neriniartarfii takusassaqqissortaalu artukkerneqalereersimapput, tamannalu takornarissat unnuisussat illoqarfimmilu aningaasanik akiliisussat misigisassaannut aseruisarpoq, Palle Jerimiasen oqarpoq. Taassuma ilanngullugu ilisimatitsissutigaa, umiarsuit takornariartaatit tulattarneri kommunip annikitsuinnarmik aningaasarsiuutigisarai.
- Umiarsuit tulatsittakkavut akileraaruteqartarput, akileraarutigineqartorli toqqaannartumik Namminersorlutik Oqartussat karsiannut nakkartarpoq, uagullu Ilulissaniittugut tassaagajuttarpugut ornitami kingullermiittut, takornarissat ornitani allani sanalukkanik allanillu pisereersimasarput, nunamiinnerminnilu annerusumik aningaasanik atuineq ajorlutik, Palle Jerimiassen nassuiaavoq.
Pinngortitamik piujuartitsineq aningaasaqarnerlu
HTakornarissat taamak amerlatigisut Kalaallit Nunaannut aammalu Ilulissanut tikittarneri nuannaarutigaa, ingerlanneqarnerali ataqatigiittariaqartoq oqaatigalugu.
- Soorunami takornarissat amerlasuut sullinneqarneri aningaasartuutaasarpoq. Talittarfik
aserfallatsaaliorneqartartussaavoq, UNESCO-miit nunarsuarmioqatigiinnut
kingornussassanngortinneqarsimasut paarineqartariaqarput, ataatsimullu isigalugu illoqarfik
sullissisinnaasunik peqartariaqarpoq. Soorunami takornariaqarnermiit tamakkua aningaasaliiviginerisigut ikiorsiivigineqartariaqarput. Taamaammat pingaaruteqarpoq takornariaqarnerup piujuartinneqarnissaa qulakkiissagipput, aammattaaq pinngortitamut aningaasaqarnermullu tunngatillugu.