Borgmesteri kunngissap arpatsitsinissaa pillugu nuannaartoq
Charlotte Ludvigsenip qilanaaraa Kunngissap Frederiup Royal Runimik aallartitsiartorluni Nuummukarnissaa
Kunngissap Frederiup 2018-imi 50-inik ukioqalerneranut atatillugu Royal Run siullermik ingerlanneqarmalli arpatsitsineq Nuummi aamma ingerlanneqarsimavoq - kunngissaq ilaanngikkaluartoq.
Ukioq manna tamanna allanngortinneqarpoq, tassa Royal Run Danmarmiki ingerlanneqarnissaa ullunik sisamanik sioqqullugu, Nuummi maajip 28-ani ingerlanneqartussanngormat.
- Royal Run-ip ingerlanneqarnissaanut aaqqissuisuunerput assut nuannaarutigaarput, ilaatigut inuiaqatigiit peqqissusaasa ukkatarinissaa peqataaffigissagatsigu. Nuuk siusinnerusukkut nunani tamalaani aaqqissuussanut kulturikkut timersornikkullu katersuuffiusunut aaqqissuisooreerpoq. Kommunimi innuttaasut Nuummi pinngortitamik kusanartumik avatangiiserissaarlutik Kunngissaq peqatigalugu ataatsimut arpaqatigiinnissamut periarfissaqalerput. Illoqarfitta takutinnissaanut qilanaarpugut, Kommuneqarfik Sermersuumi borgmesteri Charlotte Ludvigsen tusagassiorfinnut nalunaaruteqarnermini oqarpoq.
Illoqarfimmi kajumissuseqarluni suliniuteqartartoq Kim Godtfredsen arpannermik aaqqissuisuussaaq.
- Naalagaaffeqatigiinnermi arpannermi aaqqissuussani annerpaaq, Royal Run, Kalaallit Nunaanni ingerlanneqassaaq. Kalaallit Nunaanni inuit aatsaat taama amerlatigisut katersuunnissaannut qilanaarpunga - ingasassaqaaq. Neriuppunga arpannermut soqutiginninnerulersitsiumaartoq taamaalillunilu ulluinnarni aalanerulernissamut iluaqutaajumaartoq,” arpannermut aaqqissuisoq Kim Godtfredsen tusagassiorfinnut nalunaaruteqarnermi oqarpoq.
Siorna Savalimmiut Kunngissaq Frederimmik arpannermut atatillugu tikeraarneqarpoq, ukioq mannalu Kalaallit Nunaannut tassunga atatillugu tikissalluni.
- Nuummi Royal Run-ip ingerlanneqarnera peqataasunut tamanut nuannerluinnartumik misigisassaannaassanngilaq aammali Royal Run-ip ingerlanneqarnissaanut takorluukkat ilagilluinnarpaat. Royal Run ataatsimoortunut nuannisaqatigiinneruvoq, taamaalillutalu Naalagaaffeqatigiinneq Kunngissaq kalaallillu peqatigalugit Nuummi nalliuttorsiutiginissaanut periarfissaqalerpugut. Soorlu Savalimmiuni 2019-imi Royal Run-imut atatillugu Danmarkimi Royal Run-ip piinsimi ingerlanneqarnissaa nalunanngitsumik immikkuullarilluinnassaaq, Jakob Larsen, Dansk Atletik-imi pisortaasoq Idrætsvisionen Bevæg dig for livet, Royal Run-imik aaqqissuisuusut sinnerlugit taama oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...