Borgmesteri isornartorsiuineq pillugu: Tupaallannarlunilu annertuvoq

Kommuneqarfik Sermersuumi ineqarnermut tunngatillugu ingerlatsisimaneq kukkunersiuisumit Deloittemit misissuiffigineqarmat arlalitsigut isornartorsiorneqarsimavoq.

Ilaatigut isornartorsiorneqarsimapput, kommunip inissanik pissarsiniarnermut atatillugu namminersortutut aningaasaliissuteqartartunut qaqutigoortumik iluaqutaasumik isumaqatigiissuteqarsimanera, immaqalu malittarisassat malinnagit pisortatigoortumik taarsigassarsisitsisimanera, arlalitsigullu kommunimi piginnaatitaaffiit unioqqutillugit pisoqartarsimanera kiisalu inerteqqutaasumik inuussutissarsiuteqartumut tapiissuteqarsimasinnaanera.

Borgmesterip Charlotte Ludvigsenip (IA) kukkunersiuisup inerliussarisimasai tupaallaatigai:

- Nalunaarusiq suliarineqarsimasoq tupaallannarlunilu annertuvoq. Nalunaarusiami pissutsit arlallit uparuarneqarput, taakku erseqqinnerusumik malitseqartinneqarlutillu nalilersorneqassapput. Tamatuma saniatigut nalunaarusiami arlalinnik inassuteqaateqartoqarpoq, taakku pivisunngortinneqarnissaat eqqarsaatigisariaqarpavut, Charlotte Ludvigsen allakkatigut akissuteqarluni oqarpoq.

Iluarsaassisoqartoq

Borgmesterip ilanngullugu oqaatigaa, kommunimi iluarsaassisoqaleruttortoq:

- Nalunaarusiami aqutsinermi pissutsit taaneqartut arlallit kingusinnerusukkut aatsaat ilisimasaqarfigilersimavakka, pineqartullu iluarsaallugit suliarileruttorpavut, pitsaasumik iluarsaanniarlugit, Charlotte Ludvigsen allappoq.

Kommunip namminersortutut aningaasaliissuteqartartunut arlalinnut attartornissamik isumaqatigiissuteqarsimaneranut borgmesteri itinerusumik ilisimasaqannginnerarpoq:

- Aallarniutigalugu ilisimatitsissutigissavara, inuussutissarsiuteqartunut attartornissamik isumaqatigiissutaasimasut tamarmik uanga suli borgmesterinngunnginninni pisimammata, taamaammat kommunalbestyrelsimi ilaasortat allat assigalugit taakkununnga tunngatillugit ilisimasaqarpallaanngilanga, Charlotte Ludvisen oqarpoq.

Borgmesteriup siusinnerusukkut aalajangiussimallugu oqaatigaa, kommunip inissanik pissarsiniarnera pineqartoq, kommunillu inissanik nammineq sanaartortitsinissaanut sanilliullugu taamatut aaqqiissuteqarsimaneq akikinnerusoq.

Taarsigassarsisitsisimanermik aamma iluarsartuussisoqartoq

Periuserineqarsimasorli kukkunersiuisumut sakkortuumik isornartorsiorneqarpoq, ilaatigut inerniliunneqarsimalluni, kommuni periuserineqarsimasoq inatsisit malillugit ingerlanneqarsimanersoq, isumaqatigiissutit aningaasaliissuteqartartunut "qaqutigoortumik iluanaartitsisimanerat" aamma inatsisit unioqqutillugit 131 millioner koruuninik taarsigassarsisitsisoqarsimanersoq pillugit aallaqqaammulli naliliisimanngitsoq.

Kukkunersiuisup nalilerpaa, kommuni malitarisassanik malinnittoqarsimanersoq pillugu misissuissappata taarsigassarsiat akilerneqartariaqartut.

Borgmesterip oqaatigaa, tassunga atatillugu aamma iluarsartuussisoqartoq:

- Aaqqissuussaassutsimik allannguiniarluta ingerlatsereerpugut, allannguinikkut inissialiortitsisarnerit, inissanut taarsigassarsisitsisarnerit pingaartumillu malittarisassanik malinnittoqarsimanersoq pillugu nakkutilliisoqartarneq ukkatarineqarnerulissapput. Suliassaqarfik taamaalilluni siunissami eqqumaffigineqarnerulissaaq. Suliarineqarsimasut tamarmik maannakkorpiaq misissuiffigineqarput, kukkussutaasimasutullu nassaarineqartut iluarsiiffigineqartarlutik, borgmesteri oqarpoq.

Inuttut iluanaarniuteqartoqarsimaneranik ilisimasaqanngitsoq

Kukkunersiuisut uissuumminartumik isornartorsiugaa alla tassaavoq, kommunimi pisortaasimasup ingerlatsivimmi aalajangiunneqarsimasumik allannguisimanera. Pisortaasimasoq sanaartortussamut iluaqutaasussamik aalajangiisimavoq, tamannali allakktigut uppernarsarlugu tunngavilersorneqarsimanani.

Tamanna peqquserluuteqarsimasutut oqaatigineqarsinnaavoq, Aalborg Universitetimi professori Per Nikolaj Bukh suliamik Sermitsiaq.AG-mit saqqummiussiffigineqarsimasoq oqarpoq.

Borgmesteri suliaq pillugu imatut oqarpoq:

- Allaffeqarfimmi sulisut tamarmik immikkut pisussaaffigaat, sulianut pineqartunut atatillugu inatsit naapertorlugu tunngavissaqarluartumik eqqortumillu aalajangiissuteqarnissaq. Tamanna pisimanngippat pisariaqartinneqartunik kinguneqartitsissaanga. Manna pineqartoq sulisunut attuumassuteqarmat tusagassiorfiit aqqutigalugit oqaaseqaqqinnissara akisussaassuseqannginnerussaaq.

- Borgmesteritut inuttut aningaasatigut iluanaarniartoqarsimasinnaaneranut atatillugu qulakkeerlugu oqaatigissavara, iluanaarniuteqarsimannginnama. Allat iluanaaruteqarsimanersut naluara, maannamulli ilisimasakka malillugit taamaattoqarsimarpasinngilaq. Sulialli sulisunut kinguneqartitsisinnaasut pillugit itinerusumik oqaaseqarsinnaanngilanga, oqaatigineqareersutut sulisunut tunngassuteqarmata, Charlotte Ludvigsen oqarpoq.

Sermitsiaq.AG-mit pisortaasimasoq attavigineqarsimavoq, taannali maannakkorpiaq oqaaseqarusunngilaq. Aamma kommunimi pisortaanerusimasoq Lars Møller-Sørensen ingerlatsisimanermik misissuisoqarsimanera pillugu maannakkorpiaq oqaaseqarusunngilaq.