Borgmesteri imarsiornermi attaveqatigiit pillugit: Isumassarsiffigisinnaavagut ilinniarfigeqatigiissinnaallutalu
Kommuneqarfik Sermersooq Aalborgilu imarsiornermi attaveqatigiit inerisarneqarnissaannut isumassarsianik avitseqatigiissinnaasut borgmesteri isumaqarpoq. Sapaatip akunnerani matumani Aalborgimi Kalaallit Nunaannut ulloqartitsisoqarnerani Nuuk Maritime Network peqataavoq.
Aalborgimi sapaatip akunnerani matumani Kalaallit Nunaannut ulloqartitsisoqarneranut Kommuneqarfik Sermersuumi borgmesteri Charlotte Ludvigsen peqataavoq. Pingasunngornermi imarsiornermi inuussutissarsiutit inerisarnissaat pillugit isumasioqatigiinneq aallartippoq, ilaatigullu attaveqaatit piujuartitsinerlu sammineqarput kiisalu Aalborgimi umiarsualivimmi suleqateqartarneq aamma sammineqarluni Nuummilu qanittumi aallartittoq Maritime Network pillugu aamma saqqummiisoqarluni.
Borgmesteri Charlotte Ludvigsen isumaqarpoq suleqatigiinnermi angusaqarluartoqarsinnaasoqt.
- Aalborgiminngaanniit saqqummiunneqartut pissanganaqaat qularinngilaralu ilisimasat isumassarsiallu Nuummi atorluakuttoorsinnaassagigut kiisalu Aalborg kommunemi imarsiornermi tunngasunik suliaqartunut attaveqarnerput inerisarneqarumaartoq, borgmesteri oqarpoq.
Aalborgimi ilinniartut pillugit suleqatigiipput, tassani ilinniartunik ataqatigiissaarisoq suliffeqarfiit sulisunik piukkunnartunik ilinniartitsinissaannut tapersersuisarluni. Nuummi Maritime Networkip ukkutarisai aamma tassaapput piukkunnaateqartunik sulisoqartarnissaq.
- Kommuneqarfik Sermersuuminngaanniit ataqatigiiaat nutaat qujaruppagut imarsiornermilu tunngasunik ineriartortitsinermi siuarsaanermilu pitsaasunik atugassaqarnissaq peqataaffigerusupparput, soorlu Aalborgimi tamanna pikkoriffigaat. Nuannaarutigaarput Nuuk Maritime Networkip aqutsisui Aalborgimi Kalaallit Nunaannut ulloqartitsinermi peqataammata Aalborgimilu inuussutissarsiutilinnut saqqummiisinnaammata, Charlotte Ludvigsen oqarpoq.
Attaveqatigiit pillugit
Nuuk Maritime Network 2021-mi maajimi pilersinneqarpoq, imarsiornermi tunngasuni piujuartitsiviusumik ineriartortitsinissaq siuariartornerlu anguniarneqarpoq. 50-it sinnerlugit ilaasortaqalereerpoq, ilaasortallu tassaapput Nuummi imarsiornermut tunngasunik suliaqartut 1.900-t missaanniittut.
- Nuuk Maritime Network nutaajuvoq, aallaqqaataaniilli imarsiornermut tunngasunik suliaqartut isumassarsiorfigisimavagut, soorlu ulluni makkunani Aalborgmi nunatsinnut tunngasunik sammisassaqartitsinermi. Qaaqqusaanerput peqataanerpullu nuannaarutigaarput, ingammik ulluni makkunani imarsiornermut tunngasut aamma sammineqarluarneranni, Cuno Jensen Nuummi Maritime Networkimi ingerlatseqataasoq oqarpoq.