kommunimut qinersineq
Borgmesteri IA-meersoq: Siumup oqaatsikka allamut sangutippai
Uukapaatitsineq imaluunniit naamik. Politikkikkut unammillertigiit borgmesteri IA-meersup Asii Chemnitz Narupip aamma Siumumeersup Bitten Høegh-Damip Kommuneqarfik Sermersuumut qinigassanngortittut saqitsaanneranni tamanna pineqarpoq
Siumup videoliaq aaqqissoriarlugu Facebookimut ivertissimasaata, Asii Chemnitz Narupip inuusuttunut ilinniartunut qinersisartunik ataatsimiittoqarnerani oqariartuutaasa allamut saatinnerai saatinnginneraaluunniit saqitsaassutigineqarpoq.
Nuummi Ilisimatusarfimmi qinersisartunik qanittukkut ataatsimiititsisoqarnerani Asii Chemnitz Narupip (IA) illoqarfiit pingaarnersaanni ilinniartut oqallikkumatunerunissaannik kajumissaarpai.
- Maani Nuummi ilinniartut oqallinnernut tunngatillugu nipaappallaarujussuaqaasi. Inuusuttuunitta nalaani ilinniartuulluta sorpassuartigut isummersueqataasarpugut, Asii Chemnitz Narup ilaatigut oqarpoq. Videoliaq uani allaaserisap ataani takuuk.
Atuaruk: D: Siorarsiorfimmi suliniut pillugu Siumut ingasaassilluni saassussisoq
Asii: Oqaatsikka allamut sangutinneqarput
Asii Chemnitz Narup kisianni kingorna Bitten Høegh-Damip Facebookiani allappoq, videoliami aaqqissukkami taassuma isumaa sangutinniarsarineqartoq. hendes mening.
Asii Chemnitz Narup Bitten Høegh-Damip Facebookiani ima allappoq:
- Oqaatsikka ataasinnguamilluunniit sangutinniassanngilatit. Kaammattuivunga ilinniartut ataavartumik oqalliseqataasaqqullugit, demokratii atorluaqqullugu. Taamaammat oqarpunga: 'Nipaappallaaqaasi'.
- Ilinniartut isummersuutaat atorfissaqartikkatsigit ujartorikka. Sangutitsiniaanerit tupigilluinnarpara, akuersaartuunagulu, Asii Chemnitz Narup Siumumit qinigassanngortittumut allappoq.
Atuaruk: Asii Siumumit saassunneqaqqittoq
Oqariartuutit isumaqatiginngikkai
Borgmesterip ilinniartunut kaammattuutaa paasisinnaanagu Bitten Høegh-Dam nalunaarummi allappoq.
- Uanga ilinniartut ilinniarsimasullu, nunatsinni aatsaat taamak amerlatigilertut nipaanneranut, toqqaannartumik sutigut tamatigut, akerliunera ersersarpara, Bitten Høegh-Dam allappoq, taanna Asii Chemnitz Narup isumaqatiginagu - ilinniartut oqalliseqataallaqqissut isumaqarpoq, soorlu Facebookikkut allatigullu.
Killileresuiniartoqassanngitsoq
Demokraatit siulittaasuata Randi Vestergaard Evaldsenip Siumut isornartorsiorpaa, allalluni partii 'qineqqusaartuni filmiliortalerpoq, kingornalu immiussatik qiortartarpaat politikerillu oqaasii ilaannakoortut ataqatigiinngitsullu uukapaatitsiniutigalugit Facebookimut ivertittarlugit mamiasungaartusaarlutik'.
Bitten Høegh-Dam aamma tassani isumaqataanngilaq:
- Taamaammat uagut Siumut sinnerlugu qineqqusaartitsigaangatta inuit allat mattunnagit soorlu filmiliorsinnaatitaaneq ammatittuaripput, taanna oqarpoq.
Atuaruk: 'IA Sermersuumi pissaanermik annaasaqarnissaminut ernumasoq'
Videoliaq uani allaaserisap ataani takuuk: