Borgmesteri aalajangiussisimasoq: Ineqarneq pillugu suliaq akisussaassuseqarluni aaqqiineruvoq

Borgmesterip Charlotte Ludvigsenip (IA) tupaallaatiginerarpaa, Kommuneqarfik Sermersuup Nuummi innuttaasut inissaqartinniarlugit inissanik pissarsiniarnermi periuserisimasaata, Kommunit Nakkutilliisoqarfiannit akuersaarneqannginnera, aamma nakkutilliisut aalajangiussaasa ilai paasisinnaannginnerarpai.

Nakkutilliisut kommunik isornartorsiuinerannut qitiulluinnartoq tassaavoq, 'inissianik appasinnerusumik attartorneq, kommunip piginnittumut akiliutissatut pisussaaffigisaanit, akeqartillugu allanut attartortitsinermi innuttaasunik ataasiakkaanik iluaqusiineq, kommunip piginnaatitaaneranik unioqqutitsinerusoq.'

Borgmesterilli taamatut ilungersunartumik isornartorsiuineq isumaqatiginngilaa:

- Tamanna assigiinngissitsineruppat, taava inunnut tuusintilikkaanut inissarserusukkaluarluik inissarsisinaanngitsunut assigiinngissitsineruvoq, borgmesteri Sermitsiaq.AG-mut allakkatigut akissuteqaammini oqarpoq.

Borgmesterip oqaatigaa, pisortat inissiaataanni attartortorpassuit pisortanit arlaatigut tapiiffigineqartarnermikkut ineqarnermut appasikannersumik akiliuteqartartut. Aaqqissuussami siunertarineqarsimavoq, kommunip inissiaatileqatigiiffiutaa Iserit aqqutigalugu inissarsiortorpassuit ilaasa inissaannik neqeroorfigineqarsinnaanerat. Inuit Nuummi niuernermi atugassarititaasut pissutigalugit inissaminnik attartornissamut naatsorsuuteqanngitsut inissaqartinniarlugit.

Borgmesteri: Aaqqiissut kommunimut akikinnerusoq

Kommuni nissianik sanaartortitsineq nammineerluni akileriarlugu attartortitsisimasuuppat, inissiat 400-t missaanniittut pissarsiarineqarsinnaasimassanngikkaluarput, borgmesteri oqarpoq.

Sermitsiaq.AG-mit paasineqarsimasut naapertorlugit, inissit ukiumut 30 millioner koruunit missaannik kommunimut akeqartassangaluarput. Borgmesterip oqaatigaa, kommunip periuseq atukkani malillugu inissianik amerlanerusunik pissarsisimasoq:

- Pingaaruteqarpoq erseqqissaassutigissallugu, nammineq inissialiortiternermut sanilliullugu inissianik attartornerup kommunimut akikinnerunera. Aaqqissuussap ataavartumik atuutsinneqarnissaa pilersaarutaanngisaannarpoq, piffissamili aalajangersimasumi inissaaleqinerujussaq aaqqiiffiginiarlugu aningaasaqarnikkut akisussaassusilimmik iliuusaavoq, Charlotte Ludvigsen oqarpoq.

Tunngavilersuut tamanna kommunip kukkunersiuisarfimmut Deloittemut uppernarsartissimavaa. Deloittep allakkiamini inerniliussimavaa, kommunimut akikinnerussasoq namminersortunit attartoriarluni attartortitseqqiisarnissaq, Deloitte naapertorlugu tamatummunga pissutaavoq, kommunip attartortut ineqarnermut akiliuteqarnerisigut isertitassaanut sanilliullugit kommunip sanaartortitsisarnera akisuallaartartoq.

Ukiut qulit qaangiunneranni isumaqatiginninniaqqissasut

Inissianik oqallisaaqisunik attartortut eqqissisimatinneqarput, Nakkutilliisut taamaallaat peqqussutigisimagamikku, kommuni aaqqissuussamik unitsitsissasoq.

Inissiarpassuit kommunip attartorsimasai ukiuni qulini atuuttussatut isumaqatigiissutigineqarsimapput, tamatumami kinngor susoqassava:

- Attartortut inissiaatileqatigiiffiutitsinnut Iserimmut isumaqatigiissuteqarput. Ukiut qulit qaangiuppata attartorneq pillugu isumaqatigiissupput isumaqatiginninniutigeqqissinnaavarput imaluunniit inissiat pisiarisinnaavagut, borgmesteri oqarpoq.

Nakkutilliisut pingaarnertut isornartorsiugaasa aappaat tassaavoq, attartornermi isumaqatigiissutit arlallit politikkikkut akuerineqarsimannginnerat.

Borgmesterip tassunga atatillugu ilisimatitsissutigaa, isornartorsiuisoqarmat pineqartoq aaqqiiffigineqarsimasoq:

- Tassunga atatillugu oqaatigiinnarsinnaavara, aalajangiussat taakku marluk inatsisinut naapertuuttunngortinneqarsimammata, aamma kukkuneq pisariaqartumik kinguneqartinneqarsimammat. Taamatullu kukkusoqaqqinnginnissaa qulakkeerniarlugu, juunip qaammataani ineqarnermik ingerlatsineq misissortissimavarput, Charlotte Ludvigsen oqarpoq.