Borgmester Stine Egede: Kilisaaterujussuarnut raajarnianut immikkut akuersissuteqartarneq maanna unitsilli
- Kilisaatit ”angisuut” marloriarlutik pingasoriarlutilluunniit Kujataanut piumasaarsorlutik nungutsiartuinnartassanngillat. Siuariartariaqarpugut, borgmesteri oqarpoq.
Kilisaatit raajarniat avataasiortut sinerissap qanittuani raajarniartarsinnaanerannut immikkut akuersissutaat 2011-meersoq erngertumik atuukkunnaarsinneqartariaqarpoq.
Kommune Kujallermi borgmesteri Stine Egede aviisimut Sermitsiamut oqarpoq.
Sinerissap qanittuani raajaniarfiit nungullugit aalisartaqataasarsimasoq kilisaammi avataasiortumi siornatigut naalagaasimasoq Sermitsiamut sapaatip akunnerata siuliani saqqummertumi allaaserineqarpoq. Kilisaatillu avataasiortut angalatillutik sanioqqukaangamik raajaqarnersoq misissortuartaraat. Aalisartut nunaqavissut raajartassaaruttarnerannik tamanna kinguneqarpoq, imaluunniit najugaqarfiini raajanut tunisassiorfeqalernissamik tunngavissaqarani.
Immikkut akuersissutip allanngortinneqarnissaa aamma allanngortinnissaanut pilersaaruteqaratik naalakkersuisoqarfik oqarpoq.
Taamaattoqarnera pillugu Stine Egede Sermitsiamut ima oqarpoq:
- Naalakkersuisoqarfiup piviusut ilisimasaqarfiginagit aalajangiisinnaanerat pakatsinartorujussuuvoq. Nalunaarusiat misissuinersullu suut aallaavigineqarnersut imaluunniit aalisartut ataasiakkaat ilisimasaat tunngaviginagit aalajangiinerminni.
- Najugaqartut aalisartarfitsik ilisimasaqarfigaat.
Aviisimi Sermitsiami atuarnerusinnaavutit. Aviisi uani pissarsiariuk:
