Borgen sammivinnik allanngortitsivoq
Angunnguaq Larsen HBO-mi tv-iikkut aallakaatitassiami maannakkut suliarineqartumi ”True Detective”-mi peqataavoq. Isiginnaartitsineq saniatigooralugu suliarisarpaa. Taamaakkunnaarsimavorli – tamannalu peqqutissaqarpoq!
Maanna Angunnguaq Larsenip isiginnaartitsisartut tusaamasaanerpaat ilaat isaasigut toqqarlugit isigisinnaavai. Soorlu Jodie Foster, ”True Detective”-mi aamma peqataasoq.
- Upperiuminaappoq HBO-p filmiliaani taama annertugisumi peqataaneq. Ilaatigut Jodie Fosterip ataqqinarluni mianernartup naapinnera, Angunnguaq Larsen oqarpoq, aamma ilaatigut rockimik nipilersoqatigiinni ”Chilly Friday” guitarertartuusoq.
Piffissalli annersaani isiginnaartitsisarpoq. Iluatsittumillu.
Aviisi AG taama allappoq.
Angunnguaq Larsen aamma filmimi naatsumi ”Ivalu”-mi Oscarinnattussatut innersuunneqartumi peqataavoq. Inuttaaffiuvoq aallaqqaammut naaggaarsimasaa.
1976-imi Angunnguaq Larsenip Nuummi inunngorneranit aallarteriarta. Sumiiffinni assigiinngitsuni pingasuni peroriartorpoq: Aasianni, Nuummi Norgemilu.
Norgemi meeqqat atuarfianni atualerpoq, ilaqutariit ukiuni pingasuni tassani najugaqarmata, angutaa ilinniartussaalluni. Nukappiarannguamut allannguut annertoqaaq. Tassanngaannaq suut tamarmik allanngorput. Nuna alla, oqaatsit nutaat avatangiisillu nutaat. Norgemiinnini nuannersutut eqqaamavaa. Ikinngutitaartorpoq, orpiit nuannarilluinnarlugit Norgemiusullu oqallorilluni.
Angunnguaq Larsen meeraanermi annersaani Nuummiippoq. Ikinngutinilu aneertaqaat. Nuup ilaani Narsarsuarmi BMX-inik sikkilinngikkaangamik arsaattarput. Nukappiaraavoq qunusuitsoq tamatigut killigititanik qaangiiuaannartoq.
Arnaa Maria ilinniartitsisuuvoq, Angunnguaq Larsenilu anaanaminit sisamanik qatannguteqarpoq. Angutaa Ujuuki aamma ilinniartitsisuuvoq, taassumanngalu pingasunik qatannguteqarluni. Angajoqqaavi ataqqineqarput. Inuit nuannaraat. Immaqa ilinniartitsisuummata, Angunnguaq Larsen eqqarsarpoq.
Juullikkunni ilaqutariit Aasianni Angunnguaq Larsenip aanakkuiniittarput. Meeraanermini Angunnguaq Larsenip eqqaamasaasa nuannernerit ilagaat aanami juullimi qeerlutuuliaa, ataatsimoorneq, asanninneq unnukkullu filmeqatigiinneq. Tamakku puigunaatsippai.
Meeqqat atuarfiata kingornagut AFS aqqutigalugu Australiami paarlaateqatigiinnikkut ilinniartuunissaq takorluugaraa. Angunnguaq Larsen flymekanikeritut ilinniarusuppoq. Inuunerli allanik pilersaaruteqarpoq. Nuummi GU-mi ilinnialerpoq. Angusarissaarpoq, pikitsitsiniartuuneratali sunnerpaa. Suulluunniit kialuunniillu inuunera aqussanngilaa.
- Angunnguaq inuusuttoq naapittuugukku oqarfigissagaluarpara ilinniarnertuunngorniarnini naammassissagaa. Ilinniarnertuunngorsimannginnini uggorilaarpaa. Inuunerli taamaappoq, Angunnguaq Larsen qungujulluni oqarpoq.
Aviisimi AG-mi atuarnerusinnaavutit. Aviisi uani pissarsiariuk:
