Skip to main content

Bolatta Silis-Høegh: Siullerpaamik kalaaliunera kanngusuutigaara

Bolatta Silis-Høeghip kisimiilluni saqqummersitaani nutaami ´Lights on ligths off´ kamanneq soriarsinnaannginnerlu takutinneqarput. Tamatumunnga pissutaasimavoq uranimut akuersaanngilluinnarnerup atorunnaarsinneqarnera. Allanilli aamma eqaamasaqarpoq

Inuiaqatigiinni akuersornanngitsuliornerit qanoq sivisutigisumik isiginngitsuusaassagatsigit? Takulituakasikkutsigillu qanoq pisoqassava?
Københavnimi nutaamik kisimiilluni saqqummersitamigut eqqumiitsuliortup Bolatta Silis-Høeghip nammineq nunagisamini, Kalaallit Nunaanni, ineriartornermut ersissutigisani takutinniarpai. Misigisarsimasanilu tupannartut, qangarsuarli puigorsimasani, nassaareqqillugit.
– Politikkikkut aalajangikkamut aatsaat taama pakatsitigaanga. Kalaallit Nunaanneersuunera aatsaat taama kanngusuutigitigaara. Aatsaat taama qalipaarusutsigilersimavunga.
2013-imi oktobarimi Kalaallit Nunaanni uranimik piiaanissamut akuersaanngiluinnarneq Inatsisartut atorunnaarsippaat. Tamanna pivoq ikinnerpaamik amerlanerussuteqarluni pipallatamillu aalajangiiniareerluni. Amerlasuut neriuutigisimagaluarpaat innuttaasut taasitinneqassasut, taamaattoqanngisaannarporli, taanna tusagassiorfinnut nalunaarummi allappoq.
Oqaluttuarisaanermut pingaarutilimmik taasinerup kingorna Københavnimi kalaallip eqqumiitsuliortup 33-nik ukiullip Bolatta Silis-Høeghip misigissutsini oqaasileruminaatsippai. Taarsiullugu sulilluni aallartippoq. Misigissutsini qalipalerpai, suliniuteqarani imaluunniit saqqummersitsinissamik siunertaqarani. Qalipagaalu uraniinnaanatik allarpassuarnik ilaqalerput.
Qanga nipangiutiinnartarsimasat qaffakaapput, isertuussat pigisani aammalu akuersornanngitsuliornerit akueriinnarsimasai. Pissutigalugu inuiaqatigiinnguani aggerfimmini tamanna pisariaqarsimammat:
– Kalaallit Nunaanni amerlasuut akuersaanngilluinnarnerup atorunnaarsinneqarnissaa akerleraat akerliliinatik. Ilatsiinnarput. Immaqa kulturimik tunngaveqarpoq inuiaqatigiinni ikittuni imminut illersorniarluni akerliliinaveersaarneq. Pisut ajortut oqaluuserineqarneq ajormata - akaareqatigiinnerup aqqani. Uran pillugu kamannera oqaasinngortissinnaasimanngilara, oqaatigineqarsimanngitsulli peroriartorninni misigisimasakka qaffakaapput. Soorlu qalipaqqullutik suaartartut, Bolatta Silis-Høegh oqarpoq.

Ileqqorissaarneq qimallugu
Qalipakkat tarrajuttuupput, kamannerit pakatsinerillu nunami taartumi, qilammi tarrajutsimi timimilu tamataqanngitsumi aattumi takussaapput. Eqqumiitsuliortup nammineq timaa.
Katsorsarnertut issimavoq; imminut isiginiarluni oqiliallannartoq, misigissutsit artornartut akueralugit. Tamana pissutigalugu qalipakkanni imminut atorsimavunga; piviusut takutinniarlugit - aamma tamanna oqiliallannarsimavoq. Arnap atisaqanngitsup timaa. Qaamasumi allat tamaasa assigai, taartumili isertukkat saqqummerput. Arnanut nakuusertarneq, maanna pinngortitamut saatinneqartoq. Lights on aamma ligths off, Bolatta Silis-Høegh oqarpoq, taassumalu saqqummersita Amagerimi Kastrupimi Bryggergårdenimi aggustip 16-ianniit 24-annut takuniarneqarsinnaapput.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER