Boksit qernertut atorlugit timmisartup nakkarneranut pissutaasoq paasineqarsinnaavoq

Timmisartorsualiortartup Boeingip timmisartut 737 MAX 8-it tunniuttarunnaarallarpai. Timmisartoq taama ittoq Etiopoami nakkarmat inuit 157-it ajunaarput. Siorna oktoberimi timmisartoq Boeing 737 MAX 8 Indonisiami aamma nakkarpoq. Nakkarnermi inuit 189-it ajunaarput.

Maanna misissorneqalerpoq nakkarnerit marluk imminnut attuumassuteqarnersut, timmisartullu boksii qernertut misissuiffigineqarnerisa ernernerat maanna pissanngatigineqarluni utaqqineqarpoq.

Nutaarsiassaqartitsivik ritzau.dk taama allappoq.

Timmisartup boksii qernertut, timmisartup nakkarnerani pissutaasut pillugit qulaajaanermi pingaaruteqarluinnartut, pillugit paasissutissat ataani atuarsinnaavatit:

• Timmisartut tamarmik marlunnik bokseqarput, nalinginnaasumik timmisartumi tunorlerpaami inissinneqartarlutik. Boksit qernertunik taaneqartaraluartut, taamaattoq qalipaataat orangeaapput. Qalipaataat ersarissuutinneqartarput, timmisartoq nakkaraluarpat nassaariuminarnerussammata.
• Boksip aappaa Flight Data Recorderimik (FDR) taaneqartarpoq. Taassuma timmisartup sukkassusaa, qanoq qutsitsigisumiinnera, sumukarfia, timmisartup uiganera angalanermilu paasissutissat allat tamaasa nalunaarsortarpai.
• Boksi qernertup aappaa Cockpit Voice Recorderimik (CVR) taaneqartarpoq. Taassuma aquttarfimmi timmisartumik aquttut attaveqaqatigiinnerat, nunamilu timmisartunik aqutsisumut attaveqarneri tamaasa immiuttarpai.
• Oqaluttuarisaaneq pillugu ilisimatusarsimasut arlallit isumaqarput immikkut ilisimatusartup David Warrenip boksit qernertut pillugit isumassarsiani 1950-ikkunni ineriartortissimagaa.
• Boksi qernertoq ataaseq 4,5 kilot missaannik oqimaassuseqarpoq.
• Boksit qernertut imarisaat sukkasuumik nalilersorneqarsinnaasarput, taamaasilluni susoqarsimanersoq soorlu taama pisoqarsimanersoq piaartumik qulaajarneqarsinnaalluni. Tamatigungajalli paasiat susoqarsimaneranik qularnaatsumik ilisimasaqalernissamut naammattanngillat. Susoqarsimaneranik qularnaatsumik paasisaqassagaanni qaammatit arlallit ukiulluunniit arlallit atorlugit misissuinissaq pisariaqarsinnaasarpoq.
• Boksit qernertut misissorneranni qulaajaanerit tupaallannarnerit ilaat 2015-imi pivoq. Tassani paasinarsivoq timmisartumi aquttup aappaa aquttarfimmit timmisartumi aquttoqatimini mattunneqarsimasoq, timmisartup aquttua mattussisoq imminut toqunniarluni oqarsimavoq. Timmisartoq 144-nik ilaasoqarluni nakkarnerata nalaani timmisartumi aquttuusup aquttarfimmut matu ammarniaraluarpaa, iluatsinnaguli.