Bødker Naligiissitaanermut Siunnersuisoqatigiinni ingerlaqqippoq

Naligiissitaanermut siunnersuisoqatigiinni siulittaasoq, Kathrine Bødker, innersuunneqaqqinnermi kingorna siulittaasutut ingerlaqqissinnaanngorpoq.

Naligissitaanermut siunnersuisoqatigiinnut innersuussisoqareernerup kingorna, ilaasortassanik toqqaasoqareermat naalakkersuisut tusagassiorfinnut taama nalunaaruteqarput. Siunnersuisoqatigiit nutaat 1. januar 2023-miit 31. december 2026 tungaanut atuutissapput.

- Naligiissitaanermut ilaasortat ataatsimoorlutik Naalakkersuisut naligiissitaanermut suliassaqarfimmi anguniagaqarnerannik tapersiinissamut ineriartortitsinissamullu pisariaqartunik piginnaasaqarput ilisimasaqarlutillu. Siunnersuisooqatigiit meeqqat, inuusuttut, inuussutissarsiortut, inatsisilerinerup iluanni suliassaqarfinnit atituumik katitigaapput aammalu nakuusernerit inissisimanerannut allanullu suiaassutsimut tunngasunut paasisimasaqarlutik, naligiissitaanermut naalakkersuisoq, Naaja H. Nathanielsen oqarpoq.

Naligiissitaaneq aallukkaa

Kathrine Bødker 8. marts gruppemit Naligiissitaanermut siunnersuisoqatigiinni 2029-2022-mi siulittaasussatut innersuunneqarnermini siulittaasunngorpoq.

Siulittaasutullu sulinini ingerlateqqissinnaanngorpaa.

Ilaasortanngortut aajuku:

• Kathrine Bødker, 8. marts gruppen (siunnersuisoqatigiinni siulitaasoq)
• Britta Keldsen, Sulisitsisunit inassutigineqartoq
• Rasmine Hansen, MIO-mit inassutigineqartoq
• Grethe Siegstad, meeqqanik ilaqutariinnillu katsorsaanermut immikkoortortaqarfimmit inassutigineqartoq
• Mads Pedersen, Atorfillit Kattuffiannit inassutigineqartoq
• Sofus Fenger Hove, Greenland+-imit inassutigineqartoq
• Mikkel Andreasen, Unicefimit aamma Kalaallit Meerartaannit inassutigineqartoq

- Siunnersuisoqatigiit suleqatigilluarnissaat qilanaaraara, tassami suiaassutsikkut naligiissitaaneq qulequtaavoq pingaartittorujussuusara. Siunnersuisoqatigiit nunatsinni angutinut arnanullu pitsaasunik atugassaqartitsinissamik qulakkeeriniarluni suliaqarnermi eqeersimaartumik peqataanissaat tatigaara, naalakkersuisoq oqarpoq.