Bluejay Mining nutaamik pisortaanertaarpoq

Bluejay Miningip ingerlanneqarnera allannguuteqarpoq.

Aatsitassarsioqatigiiffimmi pisortaaneq Rod McIllree atorfimminit tunuarniarluni aalajangerpoq, maannalu Bo Møller Stensgaard Bluejay Miningimi pisortaanertut atorfinitsinneqarluni.

Rod McIllree allannguutit pillugit ima oqarpoq:

- Bo Møller Stensgaardip pisortaanertut atorfinitsinneqarnera nuannaarutigaara. Kalaallit Nunaat pillugit ilisimasanik ulikkaarpoq, aatsitassarsioqatigiiffiup pingaarnertut suliaanut, Dundasip eqqaanut, misilittagai atorluarneqarsinnaassapput.

Rod McIllree Bluejay Miningimi siulersuisunut siulittaasuuginnassasoq ilisimatitsissutigineqarpoq.

Dundas Titanium A/S-p nunatta kitaata avannaani Moriusap eqqaani piffimmi 64 km2-inik annertussuslimmi piiaanissamut akuersissummik tunineqarpoq qaammat kingulleq.

Dundas Titanium A/S aatsitassat atortussiat oqimaatsut piiarnissaannik piginnaatinneqarpoq, tassani nunap qaavani sioqqanit ilmenit aatsitassallu atortussiat oqimaatsut allat titaniumitallit ilanngullugit.