Skip to main content

Blog: Meeqqat aasaanerani sammisaqartinneqartut

Kalaallit Meerartaasa aasaanerani Qeqertarsuarmi sammisaqartinneqarnerat pillugu oqaluttuaq atuaruk.

Ataasinngornermit juunip 28-ani - nammineq kajumissutsitsinnik suliaqartartuusugut 16-iulluta suliniummillu aqutsisoq ataaseq - Kastrup Lufthavnimi ullaakkut nal. 6:45 immitsinnut naapippugut. Kangerlussuarmukarniarluta. Eqimattaalluta Kalaallit Meerartaannit aamma Mellemfolkeligt Samvirkemit toqqarneqarsimavugut, sulissarivarpullu juulip qaammataani Qeqertarsuarmi meeqqat inuusuttullu arlalinnik sammisassaqartinnissaat.

Akunnitsinni amerlanerpaat immitsinnut naapinngisaannarsimavugut, Qeqertarsuarmullu ingerlaqqitsinnata ullut tallimat siulliit Kangerlussuarmi mattusimasussaalluta.


En pige leger i hallen
Peder Trolle, Kalaallit Meerartaat

Mattusimanitsinni immitsinnut ilisarisimaqatigiilerniarpugut, Qeqertarsuarmilu sapaatip akunnerini pingasuni sammisassaqartitsinissaq pilersaarusiorlugu. Arlalippassuarnik pinnguartitsisarnissaq, oqaloqatigiittarnissaq sammisassaqartitsinissallu qanoq ingerlanneqarnissaanik aalajangiussaqarnissaq pilersaarutaalluni. Aamma Kalaallit Nunaanni pinngortitamik siullermeerluta misigisaqarnissamut periarfissaqartinneqarsimavugut. Ilaatigut Russel Gletscheri takuniarparput, Kangerlussuup orpeqarfituaa takuarput, orpiit 100-t missaanniittut sorsunnersuup aappaani ikkussuunneqarsimapput, golfertarfik nunarsuarmi avannarpasinnertaasumiittup aappaa takuniarparput kiisalu tasermi nalulluta (nillataarluinnartumi). 

Nipilersorluni festivalertitsineq

Arfininngornermi juulip pingajuani timmisartumik Ilulissanukarpugut - tassani nassatavut taqussagullu Diskolinep umiatsiaanut Targamut Qeqertarsualiartussamut ikiorarpavut. Qeqertarsuarmukarnerput nalunaaquttap akunnerinik marlunnik sivisussuseqarpoq - aqqutaanilu iluliarpassuit arferillu maluk takuagut.

Tikikkatta illoqarfiup atuarfianut inisseriarluta, siullertut illoqarfimmi nipilersorluni festivalertitsinermut orniguppugut, tassani Kalaallit Nunaanni nipilersortartutut ilisimaneqartut arlallit nipilersorput - ilaatigut Nanook aamma Kimmernaq. Tassani aamma periarfissinneqarpugut illoqarfimmi najugalinnik illoqarfiullu eqqaani pinngortitamik paasisaqaqqaarnissatsinnut. Illoqarfimmiinnitsinni nuannersumik aallarniutaalluartumik .

Apersortittoqartoq

Sapaammi tamattaalluta oqaluffimmi apersortittoqarnissaanut qaaqqusaavugut, oqaluffik atuarfiup saninnguaniippoq. Inuusuttut arfineq-pingasut pissangaqalutik apersortinnerminni upperisaminnik uppernarsaasussaapput - tamarmillu kalaallisooqarlutik. Tamatuma kingorna illoqafimmi sumiiffinnut arlalinnut kaffisoriartoqqusaavugut, kalaaliminernik sassaallertoqartarpoq - tamatta siullermeersumik tuttunik puisinillu usseeqqaarpugut.


Peder Trolle, Kalaallit Meerartaat

Ataasinngornermi sammisassaqartitsinerput illoqarfiup arsaattarfiani aallartipparput - arsaattarfik Kalaallit Nunaanni ivigaasaaqqanik siullersaalluni annersaallunilu sananeqarsimasoq. Ulloq taanna meeqqat arlalinnik pinnguartinneqarlutillu arsamik sammisaqartinneqarput - taakku saniatigut kiinnakkut qalipatsinnissaq assiginngitsunillu pinnguartitsinissaq periarfissaatinneqarluni. Aamma takkuttut nerisassanik assigiinngitsunik sassaallerfigineqarput. Illoqarfimmi sapaatip akunnerata naanerani festivalertitsisoqarnerani apersortittoqarneranilu ulapputtoqarsimagaluartoq meerarpassuit taakkulu angajoqqaavit peqataajartorsimapput - tamarmillu nerisassanik assigiinngitsunik ussiitinneqarlutik.

Sila akorngusiisimasoq

Marlunngornermi siullertut sammisassaqartitsiffissatsinni silarluppoq. Taamaammat aalajangerpugut, atuarfimmi atuarfiullu anitsiartarfiani sammisaqartitsiniarluta. Royal Arctic Linelli umiarsuaataa atortussatsinnik usisoq, Soorlu Panduro Hobby, Lego il.il. pingasunngornermi ualikkut aatsaat tikittussaanera pissutigalugu aporfeqalaarsimagut. 

Kalaallit Meerartaat pillugit paasissutissat

Kalaallit Meerartaat 2014-imili aasaanerani sammisassaqartinneqartarsimapput, ilaatigut Qaanaami, Ittoqqortoormiini, Paamiuni Nanortalimmilu sammisassaqartinneqarsimallutik. Ukioq manna marloriarluni sammisassaqartitsisoqarpoq; Qeqertarsuarmi Kullorsuarmilu.

Kullorsuarmi sammisassaqartitsineq, Camp Kulloq, Kalaallit Meerartaanni namminneq kajumissutsiminnik suliaqartartut arfinillit, tassa Kalaallit Nunaanneersut, Danmarkimeersut Schweitzimeersullu kiisalu najukkani namminneq kajumissutsiminnik suleqataasut qulit suleqatigiillutik aaqqissuussimavaat. Camp Q Kalaallit Meerartaanni namminneq kajumissutsiminnik suliaqartartut 16-it, Kalaallit Nunaanneersut, Danmarkimeersut, Tysklandimeersut Italiameersullu aaqqissuussimavaat. Ukiut siuliini aaqqissuussisarsimasut nunanit tamalaaneersuunerusimapput, Coronali pissutaalluni Kalaallit Nunaannit Danmarkimiillu aaqqissuussisoqarnissaa salliutinneqarsimavoq.

Kullorsuarmi aasaanerani sammisassaqartitsineq aappassaanik ingerlanneqarsimavoq, Kalaallilli Meerartaasa siullermeerlutik Qeqertarsuarmi aasakkut sammisassaqartitsinissaq aaqqissuussimavaat.

Kalaallit Meerartaasa aasaanerani sammisassaqartitsisarnerat pillugu www.fgb.dk aqqutigalugu imaluunniit suliniutinik aqutsisartoq Gunver C. Justesen gj@fgb.dk-kkut saaffigalugu paasisaqarnerusinnaavutit.

Marlunngornermi meeqqat takkuttut naatsorsuutigisamit ikinnerupput, meeqqammi taamaallaat 20-25-t takkukkamik. Aqanguanili meeqqat 60-it sinnerlugit amerlassusillit takkullutik ulloq naallugu peqataapput. Ulluni siullerni meeqqat kikkuuneri ilikkarniarparput, suut suliaralugit nuannarinerusarneraat aamma suut soqutigivallaannginneraat paasiniarlugu. Assigiinngitsunik sammisaqartitsivugut, soorlu atit allagartaannik sanatitsilluta, titartaatitsilluta, pinnersaasiortitsilluta assigisaannillu suliaqartitsilluta. Pingasunngornermi pigisavut kingusinaarlutik tikiunneqarmata, karsit Legonik imallit arfineq-pingasuusut akornanni sisamat saqqummiuppavut, meeqqat taakku nuannarilluinnarpaat. Taamatuttaaq nuannisartut takuagut, timersortarfimmut isersinnaanngorluta arsat, pissitassaqarluni arpaffiusarut pissittaartarfiillu saqqummiukkatsigit. Sisamanngornermi tallimanngornermilu arlalippassuarnik sammisassaqartitsilluta aamma taamatut ingerlatsisimavugut.

Ilaqutariinnut ulloqartitsineq

Taava arfininngorneq ilaqutariinnut ulloqartitsiffissaq nalliuppoq. Ulloq nunarsuarmi nunanit assigiinngitsunit nerisassaqartitsilluni “Nunanit tamalaani kaffillerneruvoq”, ilaatigut Italiami, Brasiliami, Australiami Tysklandimilu nerineqartartunik sassaallerfiulluni. Peqatigitillugu assingiinngitsunik pinnguartitsivugut. Aaamma najukkami innuttaasut ilaat kalattoornermik takutitsisinniarlugit / ilinniartitsisinniarlugit qaaqqusimavagut - ajoraluartumilli nipilersuutit iluatsinneqanngitsoorput, taamaammallu ilinniartitsinissaq ullormi kingusinnerusumut kinguartinneqarluni. Inuit katillugit 130-t missaanniittut takkupput, nalunaaquttallu akunnerini pingasuni ammanitsinni nerillutillu assigiinngitsunut peqataapput. Sapaatip akunnerani siullermi Qeqertarsuarmiinnerput pilersaarutit malillugit ajunngitsumik ingerlavoq, sapaammilu illoqarfimmi meeqqat inuusuttullu nuannaartut peqatigalugit sapaatip akunnerata tulliani pisussanik aaqqissuussisoqarluni, ilaatigut Kuannit kusanaqisut ornillugit pisuttuaqatigiilluta.

Aningaasaliissuteqartut

Kalaallit Meerartaasa aaasaanerani sammisassaqartitsinerat Kommuni Qeqertalik suleqatigalugu aaqqissuunneqarpoq, aaqqissuussinermut aningaasaliissuteqarsimapput Nunafonden, Kalaallit Nunaanni Tips og Lotto, Kalaallit Nunaanni/NAPA-mi Nordens Institut, Aningaasaateqarfik Inuuneritta, Den Grønlandske Fond, KNI a/s, Royal Arctic Line allallu. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER