sprog og dyrevelfærd
Bloggertartut nutaat marluk oqallitsitsiniarput
Tom Amtoft aamma Randi Nuka Vestergaard Evaldsen bloggimi ilanngussamikkut siullikkut uumasut atugarissaarnerat oqaatsillu pillugit oqallitsitsiniarput
– Nammineq piumassutsimik sulininnut atatillugu akulikippallaamik takusarpakka inuit, ilaqutariit meeqqallu aliasoqalutik qullilillutillu qimmertik qitsuutertilluunniit toqutsittariaqaraat, ineqarnikkut atukkatik pissutigalugit. Annernartarpoq takullugu inuup kisermaap inuunermini toqqavituartik toqutsittariaqaraat. Ilumut taamaattoqassava? Ilumut Ini-p Iserillu inissiaataanni attartortittakkani uumasuutinut inissaqanngila?
Taamatut aperivoq nittartakkami uani bloggimi ilanngussamigut siullikkut uumasunik nuannarinnittoq Tom Amtoft.
Ilanngussamini ´Nuummi uumasut atugarissaarnerat imaluunniit atugarissaannginnerat´-mi isertuutinngilaa uumasut, pingaartumik qimmit, nuannarisorujussuugini.
Uagut oqaatsivut - Uagut Nunarput
29-nik ukiullip Randi Nuka Vestergaard Evaldsenip, ukiuni arfinilinni Danmarkimi najugaqareerluni Sisimiuni najugallip, bloggimi ilanngussamini siullermi ´Uagut oqaatsivut - Uagut Nunarput´-mi oqaatsit pillugit oqallinneq sammivaa.
Ilaatigut allappoq:
– Oqaatsitta avissaartuutsissanngilaatigut. Kalaallit oqaasii puigussanngilagut, aammalumi taamaasiornavianngilagut, aammattaarli qallunaat oqaasii, ilami aamma oqaatsit allat, mattutissanngilagut. Nunarsuarmioqativut oqaloqatigisinnaassavagut, pigisavullu piginnaasavullu atorluarniassavagut. Oqaatsit atortussatsinni pigisatsinni nukittunersaapput.
Randi Nuka Vestergaard Evaldsenip Tom Amtoftillu bloggimi ilanngussaat - bloggimilu ilanngussat pissanganartut allat - atuakkit uani