blog og debat
Blogger: Nuuk anginerussaaq
Sermitsiaq.AG-p blogertartua Poul Bloch Jensen siunnersuuteqarpoq illoqarfimmi innuttaasut amerliartornerat ilutigalugu qanoq isilluni Nuuk allilerneqarsinnaanersoq ineriartortinneqassanersorlu
– Nuuk anginerussaaq! Ullumikkutullu kalaallit innuttaasut pingajorarterutaat Nuummi najugaqassapput.
Taamatut bloggimi ilanngussamini nutaami allappoq Sermitsiaq.AG-p bloggertartua Poul Bloch Jensen, tassani aallaavigisimallugu Esther Boserup, nunalerinermik tunngavilimmik inuiaqatigiit agguataarnerannik ineriartornerannillu ilisimatusarsimasoq.
Taassuma tunngavilersuutaasa ilagaat inuiaqatigiit 300.000-t missaannik inoqassasut, nunalerinermi tunisassiorneq nunallu iluani tuniniaavissaq oqimaaqatigiissappata.
– Inunnik 300.000-nik tunngaveqaraanni inuit 100.000 aamma 120.000 akornanniittut Nuummi najugaqassapput. Maanna mittarfiup inissisimaneratigut imaluunniit kujammut aaqqiissutissakkut taamaattoqarsinnaanngilaq.
– Taamaattumik Nuuk Akiani illoqarfittut ineriartortittariaqarpoq tassanilu illoqarfimmik sanaartulerluni mittarfissualimmik, aluminiumik aatsitsivilimmik, erngup nukinganik nukissiorfilimmik il.il., Poul Bloch Jensen bloggimi ilanngussamini nutaani "Nuuk ineriartupiloortoq" allappoq, taannalu atuarsinnaavat uani.